प्रभात वृत्तसेवा वडगाव मावळ – वडगाव नगरपंचायत सार्वत्रिक निवडणूक २०२५ साठीची सर्व तयारी पूर्ण झाली आहे. प्रशासन आठवड्याभरापासून युद्धपातळीवर तयारी करत आहे. राज्य निवडणूक आयोगाने निवडणूक कार्यक्रम जाहीर केल्यानंतर सर्व प्रक्रिया काटेकोरपणे पार पाडल्या जात आहेत. निवडणूक निरीक्षक सुनील माळी यांच्या मार्गदर्शनाखाली निवडणूक निर्णय अधिकारी मनिषा तेलभाते आणि सहायक निर्णय अधिकारी डॉ. प्रविण निकम यांच्या देखरेखीखाली संपूर्ण निवडणूक प्रक्रिया पार पडत आहे. नामनिर्देशनपत्र दाखल करणे, छाननी, उमेदवारी माघारी, अंतिम उमेदवारांची यादी जाहीर करणे आणि निवडणूक चिन्हांचे वाटप हे सर्व टप्पे सुरळीतरीत्या पूर्ण झाले आहेत. यंदाच्या निवडणुकीत मतदानासाठी इलेक्ट्रॉनिक मतदान यंत्रांचा वापर करण्यात येत आहे. प्रत्येक केंद्रावर एक कंट्रोल युनिट आणि एक बॅलेट युनिट उपलब्ध राहणार आहे. शनिवारी (दि. २९) मतदानापूर्वीची महत्वाची प्रक्रिया पूर्ण करण्यात आली. मतदानासाठी आवश्यक यंत्रे आणि राखीव यंत्रे तयार करून त्यांचे सिलिंग करण्यात आले आहे. त्यापैकी १० टक्के यंत्रांवर १००० अभिरूप (मॉक) मतदान घेण्यात आले. या चाचणीद्वारे यंत्रांची कार्यक्षमता तपासण्यात आली. या वेळी निवडणूक निरीक्षक, निर्णय अधिकारी, नगरपंचायत अधिकारी, कर्मचारी तसेच विविध पक्षांच्या उमेदवारांचे प्रतिनिधी उपस्थित होते. १ डिसेंबर २०२५ रोजी मतदानासाठी नियुक्त पथकांना मतदान यंत्रे हाताळणीसह सर्व साहित्याचे प्रात्यक्षिक देण्यात येणार आहे. दुपारी १२ वाजेपर्यंत सर्व साहित्य संबंधित पथकांच्या ताब्यात दिले जाईल. त्यानंतर पोलीस बंदोबस्तासह अधिकृत वाहनांद्वारे मतदान केंद्रांवर साहित्य पोहोचविण्यात येईल. राज्य निवडणूक आयोगाच्या आदेशानुसार १ डिसेंबर रोजी रात्री १० वाजता प्रचार संपणार असून त्यानंतर सभा, मोर्चे, ध्वनिक्षेपकाचा वापर, जाहिराती किंवा प्रसारण करता येणार नाही. उमेदवार आणि पक्षांनी या नियमांचे पालन करावे, असे प्रशासनाने स्पष्ट केले आहे.शहरात एकूण १९,८४७ मतदार असून त्यात ९,६७९ महिला आणि १०,१६८ पुरुष मतदारांचा समावेश आहे. एकाच बॅलेट युनिटवर नगराध्यक्ष पदासाठी गुलाबी बटण आणि प्रभागातील नगरसेवकासाठी पांढरे बटण उपलब्ध राहणार आहे. दोन्ही पदांसाठी बटन दाबल्यानंतरच मतदान पूर्ण झाल्याची नोंद होईल. नियम मोडणाऱ्यांवर कठोर कारवाई मतमोजणी ३ डिसेंबर २०२५ रोजी सकाळी १० वाजल्यापासून नगरपंचायत कार्यालयात होणार आहे. जिल्हाधिकारी, पुणे यांच्या आदेशानुसार मतदान दिवशी आणि मतमोजणीच्या दिवशी मतदान केंद्रे व मतमोजणी केंद्रांच्या १०० मीटर परिसरात सर्व प्रकारची दुकाने, खानावळ्या, मोबाईल-फोन, वायरलेस सेट, लाउडस्पीकर आणि अनधिकृत व्यक्तींचा प्रवेश बंद राहणार आहे. नियम मोडणाऱ्यांवर कठोर कारवाई करण्यात येईल. निवडणूक सुरळीत, शांततापूर्ण आणि पारदर्शक होण्यासाठी सर्व यंत्रणा सज्ज असल्याचे प्रशासनाने सांगितले असून सर्व मतदारांनी मतदान करून लोकशाही बळकट करण्याचे आवाहन करण्यात आले आहे.
