शिरूर : शिरूर शहरातील महाराष्ट्र राज्य वीज वितरण कंपनीच्या कार्यालयातून तब्बल 32 हजार रुपयांचे विद्युत साहित्य चोरीला गेल्याची धक्कादायक घटना उघडकीस आली आहे. याप्रकरणी मानसिंग जगदीश नेवसे (वय 35, रा. छत्रपती कॉलनी, शिरूर) यांनी फिर्याद दिली असून, शिरूर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.

सदरची घटना दि. ४ मे रोजी सायंकाळी ६ वाजता ते ५ मे रोजी पहाटे २.४१ पर्यंत घडली. वीज वितरण कंपनीचे कार्यालय नियमितप्रमाणे ४ मे रोजी बंद करून कर्मचारी घरी गेले होते. दुसऱ्या दिवशी ५ मे रोजी सकाळी ९ .३० वाजता कार्यालय उघडल्यानंतर सहाय्यक अभियंता वैभव बारवकर यांच्या लक्षात आले की, कार्यालयाबाहेर ठेवलेला अल्युनियम कंडक्टर आणि 120 एम.एम. केबल गायब आहेत.

त्यानंतर तत्काळ CCTV फुटेजची तपासणी करण्यात आली. यामध्ये 5 मेच्या रात्री 2:30 वाजता एक अनोळखी इसम मोटारसायकलवर येऊन कार्यालयाच्या परिसरात प्रवेश करताना व चोरलेला माल मोटारसायकलवर बांधून नेताना दिसून आला आहे.चोरीस गेलेल्या मालामध्ये अंदाजे 28,000 किमतीचा अल्युनियम कंडक्टर आणि 12,000 किमतीचा 120 एम.एम. केबल यांचा समावेश आहे.

एकूण मालाची अंदाजित किंमत 32,000 इतकी आहे. संबंधित माल परवानगीशिवाय नेल्यामुळे संबंधितावर चोरीचा गुन्हा दाखल करण्यात आला आहे. या प्रकरणाचा तपास शिरूर पोलीस स्टेशनचे पोलीस हवालदार खेडकर करत असून, CCTV फूटेजच्या आधारे आरोपीचा शोध घेण्यात येत आहे. शिरूर पोलीस अधिक तपास करत असून लवकरच आरोपीला अटक करण्यात येईल, अशी माहिती पोलिसांकडून देण्यात आली आहे.