Stock Market: अमेरिका आणि भारतामध्ये लवकरच व्यापार करार (ट्रेड डील) होण्याची आशा पल्लवित झाल्याने भारतीय शेअर बाजारात शुक्रवारी (१२ डिसेंबर २०२५) जोरदार मजबुती दिसून आली. आठवड्याच्या शेवटच्या ट्रेडिंग सत्रात गुंतवणूकदारांचा सकारात्मक कल राहिला, ज्यामुळे प्रमुख निर्देशांकांनी जोरदार वाढ नोंदवली. आज ३० शेअर्सचा सेन्सेक्स (BSE Sensex) हा निर्देशांक ८५,०५१ अंकांवर उघडला आणि दिवसभर वाढ कायम ठेवत ४४९.५३ अंकांच्या (०.५३%) वाढीसह ८५,२६७.६६ वर बंद झाला. नॅशनल स्टॉक एक्सचेंजचा (NSE) निफ्टी-५० हा २५,९७१ वर उघडला आणि लवकरच २६,००० चा टप्पा ओलांडला. अखेरीस तो १४८.४० अंकांच्या (०.५७%) वाढीसह २६,०४६.९५ वर स्थिरावला. अमेरिका आणि भारतादरम्यान लवकरच व्यापार करार होण्याच्या बातम्यांमुळे गुंतवणूकदारांमध्ये सकारात्मक भावना निर्माण झाली असल्याने ही वाढ होण्याचे कारण सांगितले जात आहे. आज मेटल आणि रियल्टी क्षेत्रातील शेअर्समध्ये मोठ्या प्रमाणात खरेदी झाल्याने बाजाराला वर खेचले. पंतप्रधान मोदी आणि अध्यक्ष ट्रम्प यांच्यात चर्चा – या सकारात्मक वातावरणामागे काल गुरुवारी (११ डिसेंबर) पंतप्रधान नरेंद्र मोदी आणि अमेरिकेचे अध्यक्ष डोनाल्ड ट्रम्प यांच्यात झालेली दूरध्वनीवरील बातचीत महत्त्वपूर्ण ठरली. दोन्ही देशांचे अधिकारी व्यापार करारावर अंतिम चर्चा करत असतानाच ही चर्चा झाली. पंतप्रधान मोदींनी ‘एक्स’वर पोस्ट करत सांगितले की, अध्यक्ष ट्रम्प यांच्यासोबत अत्यंत सौहार्दपूर्ण आणि फलदायी चर्चा झाली. यावेळी भारत-अमेरिका व्यापक जागतिक रणनीतिक भागीदारीतील प्रगतीचा आढावा घेण्यात आला. दोन्ही नेत्यांनी व्यापार, ऊर्जा, संरक्षण आणि सुरक्षा यांसारख्या विविध क्षेत्रांतील सहकार्य वाढवण्यावर एकमत दर्शवले. भारत आणि अमेरिका जागतिक शांतता, स्थिरता आणि समृद्धीसाठी एकत्र काम करत राहतील, असे मोदींनी स्पष्ट केले. जागतिक बाजारातील चित्र – आशियाई बाजारात संमिश्र कल दिसून आला, तर अमेरिकेतील बाजारांमध्ये चढ-उतार पाहायला मिळाले. चीनचा सीएसआय ३०० आणि हाँगकाँगचा हँग सेंग अनुक्रमे ०.१८% आणि ०.८१% नी खाली होते, तर जपानचा निक्केई (०.७२%) आणि दक्षिण कोरियाचा कोस्पी (१.१३%) तेजीसह बंद झाले. अमेरिकेच्या फेडरल बँकेने व्याजदरात २५ आधार अंकांची (bps) कपात केल्यानंतरही डॉव जोन्स (१.३४%) आणि एस अँड पी ५०० (०.२१%) विक्रमी उच्चांकावर बंद झाले. मात्र, नॅस्डॅक ०.२६% नी घसरला, कारण ओरेकल कंपनीच्या तिमाही अंदाजानंतर आर्टिफिशियल इंटेलिजन्स (AI) गुंतवणुकी बाबत गुंतवणूकदारांमध्ये सावधगिरी दिसून आली. एकंदरीत, भारत-अमेरिका संबंधांतील सकारात्मक घटनाक्रमांमुळे आठवड्याच्या शेवटच्या दिवशी भारतीय शेअर बाजारात मोठी उसळी पाहायला मिळाली.
