इंदापूर :  मॅरेथॉनसारखा स्तुत्य, आरोग्यदायी व समाजप्रबोधनात्मक उपक्रम आपल्या नगरीत सुरू होत असून, उपक्रमाला सर्व इंदापूरकरांनी उत्स्फूर्त प्रतिसाद द्यावा, असे आवाहन इंदापूर नगरपरिषदेचे नगराध्यक्ष भरत शहा यांनी केले.

इंदापूर स्पोर्ट्स अँड हेल्थ फाउंडेशन आयोजित, वीरश्री मालोजीराजे भोसले इंद्रेश्वर मॅरेथॉन सीजन-वन, या ऐतिहासिक उपक्रमाच्या लोगोचे अनावरण इंदापूरचे ग्रामदैवत व श्रद्धास्थान असलेल्या श्रीइंद्रेश्वर मंदिराच्या पावन प्रांगणात मंगळवारी (दि. ६ ) नगराध्यक्ष भरत शहा व ज्येष्ठ नेते प्रदीप गारटकर यांच्या हस्ते करण्यात आले.

यावेळी ज्येष्ठ नेते प्रदीप गारटकर म्हणाले की, ही मॅरेथॉन सर्व समाजासाठी स्तुत्य उपक्रम आहे. देशासाठी पळा, आरोग्यासाठी पळा, ग्रामदैवत इंद्रेश्वराचे स्मरण करत पळा आणि वीरश्री मालोजीराजे भोसले यांच्या शौर्याला अभिवादन करत पळा, असा संदेश ही मॅरेथॉन देते. या स्पर्धेचे नियोजन अत्यंत शिस्तबद्ध असून, आंतरराष्ट्रीय स्तरावर मॅरेथॉनमध्ये सहभाग घेतलेले खेळाडू आपल्या भागात असल्याने ही स्पर्धा निश्चितच यशस्वी ठरेल. कोणतीही मदत लागल्यास आम्ही सहकार्य करू, तसेच आम्ही स्वतःही स्पर्धकांसोबत धावू, अशी ग्वाही त्यांनी दिली.

यावेळी इंदापूर नगर परिषदेचे माजी नगराध्यक्ष अशोक इजगुडे, इंदापूर स्पोर्ट्स अँड हेल्थ फाउंडेशनचे अध्यक्ष संतोष वाघचौरे, सचिव संदीप जाधव, खजिनदार गोपीनाथ मोरे, अंगद शहा, तसेच महाराष्ट्र राज्य मराठी पत्रकार संघाचे इंदापूर तालुका अध्यक्ष नीलकंठ मोहिते उपस्थित होते.

 

मॅरेथॉनसारखा उपक्रम इंदापूरमध्ये पहिल्यांदा सुरू होणे, ही अभिमानाची बाब असून उपक्रम केवळ एका वर्षापुरता मर्यादित न राहता, कायमस्वरूपी सुरू राहावा. यासाठी नगरपरिषद सातत्याने पाठबळ देईल.यामध्ये जास्तीत जास्त नागरिकांनी सहभाग घ्यावा. मॅरेथॉन आरोग्य जागृतीसोबतच सामाजिक एकोपा वाढवणारी आहे. ज्यांना प्रत्यक्ष धावणे शक्य नाही, त्यांनी आयोजन व व्यवस्थापनात मदत करून या उपक्रमाचा भाग व्हावे.

भरत शहा, नगराध्यक्ष, इंदापूर