मुंबई :- “मुंबई म्हणजे मराठीची राजधानी आहे. येथे मराठी भाषा टिकली पाहिजे. मुंबईतून मराठी हद्दपार होणार नाही, हा शासनाचा निर्धार आहे. मराठी भाषेचा प्रचार व प्रसार वैश्विक स्तरावर होण्यासाठी ‘मराठी तितुका मेळवावा’ या उदात्त हेतूने मराठी भाषा विभागामार्फत मुंबईत विश्व संमेलन आयोजित करण्यात आले आहे”. असे प्रतिपादन मराठी भाषा विभागाचे मंत्री दीपक केसरकर यांनी केले.

‘मराठी तितुका मेळवावा’ या पहिल्या विश्व मराठी संमेलनाचे आज मुंबई येथील नॅशनल स्पोर्टस् क्लब ऑफ इंडिया, वरळी येथे उद्घाटन झाले, त्यावेळी ते बोलत होते.

#विश्वमराठीसंमेलन२०२३ : दर २ वर्षांनी राज्यातील निरनिराळ्या शहरांमध्ये संमेलन भरवणार – मुख्यमंत्री शिंदे

मंत्री दीपक केसरकर पुढे म्हणाले की, “मुंबईतील मरीन लाईन्स येथे मराठी भाषा भवन होणार असून तेथे मराठी भाषा विभागाची सर्व कार्यालये एका छताखाली असणार आहोत.

#विश्वमराठीसंमेलन२०२३ : मराठी ही ज्ञानभाषा होणे आवश्यक – उपमुख्यमंत्री फडणवीस

तसेच “मराठी भाषेला अभिजात भाषेचा दर्जा मिळण्यासाठी आम्ही सर्व पुरावे विभागामार्फत केंद्र सरकारकडे सादर करणार आहोत. या संमेलनाच्या माध्यमातून परदेशस्थ मराठी उद्योजकांना प्रोत्साहित करणे, तसेच त्यांच्यापैकी ज्या उद्योजकांना महाराष्ट्रामध्ये उद्योग सुरु करावयाचा असेल किवा भांडवली गुंतवणूक करायची असेल त्या उद्योजकांना योग्य ती शासकीय मदत उपलब्ध करून देण्यासाठी महत्त्वाचा उपक्रम आयोजित करण्यात आलेला आहे”, अशी माहिती मंत्री केसरकर यांनी यावेळी दिली .