Marathi Film Festival – पुण्यात २२ ते २४ मे दरम्यान मराठी फिल्म फेस्टिव्हलचे सहावे पर्व आयोजित करण्यात आले असून, मराठी चित्रपटसृष्टीतील समकालीन चित्रपटांसह काही क्लासिक चित्रपटांचे प्रदर्शन या महोत्सवात होणार आहे. मराठी चित्रपटांमधील बदलते विषय, नव्या पिढीचे कथन आणि प्रादेशिक सिनेमातील प्रयोग यांवरही विविध चर्चासत्रांचे आयोजन केले आहे. महोत्सवात जैत रे जैत, तिघी, गोंधळ आणि दशावतार या चित्रपटांचे विशेष प्रदर्शन होणार आहे. तसेच, दिग्दर्शक आणि कलाकारांशी संवाद, चर्चासत्रे आणि शॉर्ट फिल्म स्पर्धा यांचाही समावेश कार्यक्रमात आहे. उदयोन्मुख दिग्दर्शकांना व्यासपीठ मिळावे, या उद्देशाने ही स्पर्धा आयोजित करण्यात आली असून, त्यासाठी फिल्म क्रिटिक्स गिल्ड आणि चित्रपट समीक्षक अनुपमा चोप्रा यांचे सहकार्य लाभले आहे. या महोत्सवाला महेश मांजरेकर, अमृता सुभाष, गिरीश कुलकर्णी, शिवराज वायचळ आणि सिद्धार्थ जाधव यांच्यासह मराठी चित्रपटसृष्टीतील अनेक कलाकार उपस्थित असतील. यंदाच्या महोत्सवात ज्येष्ठ अभिनेत्री सुहास जोशी यांना लाईफटाईम अचिव्हमेंट ॲवॉर्ड प्रदान केला जाईल. रंगभूमी आणि चित्रपट क्षेत्रातील त्यांच्या दीर्घ योगदानाबद्दल हा सन्मान दिला जाणार असल्याची माहिती आयोजकांनी दिली.
