Tilottama Shome :  अभिनेता सनी देओल आणि अक्षय खन्ना यांची प्रमुख भूमिका असलेला ‘इक्का’ हा चित्रपट नेटफ्लिक्स या ओटीटी माध्यमावर प्रदर्शित झाला आहे. या चित्रपटात विविधांगी भूमिका साकारणारी अभिनेत्री तिलोत्तमा शोम पहिल्यांदाच वकिलाच्या भूमिकेत झळकली आहे.

चित्रपटाच्या प्रमोशननिमित्ताने विविध ठिकाणी मुलाखती ती देत असून, तिने दिलेल्या एका मुलाखतीत सनी देओलसोबतचा काम करण्याचा अनुभव शेअर केला आहे.

या चित्रपटातील एका सीनच्या चित्रीकरणाविषयी सांगताना तिलोत्तमा म्हणाली, “मी हा प्रसंग कदाचित कधीच विसरणार नाही. आम्ही एका सीनचे चित्रीकरण करत होतो. सनी सरांचा भाग आधी चित्रित झाला. मग कॅमेरा माझ्याकडे वळला. सनी सर अगदी माझ्यासमोर उभे होते आणि मी माझा मोठा संवाद बोलत होते. तेवढ्यात, अनेक माश्या त्यांच्या चेहऱ्याभोवती घोंगावू लागल्या. मग, एक माशी नेमकी त्यांच्या डोळ्याच्या कडेवर येऊन बसली. मी विचार करत होते, ‘आता चित्रीकरण नक्कीच थांबेल,’ कारण अशी परिस्थिती कोणासाठीही गैरसोयीची असू शकते. पण तसे झाले नाही.”

हेही वाचा : Jasmine Sandlas : ‘धुरंधर’ फेम गायिकेने भर कॉन्सर्टदरम्यान केली साखरपुड्याची घोषणा

पुढे अभिनेत्री म्हणाली, सनी सर तिथेच उभे होते. माझा संपूर्ण संवाद संपेपर्यंत ते काहीच बोलले नाहीत. सीन संपल्यावर मी त्यांना विचारले, “तुम्ही चित्रीकरण का थांबवले नाही?” ते हसले आणि म्हणाले, “तू खूप छान करत होतीस. तुझ्या दृश्यात व्यत्यय यावा असे मला वाटले नाही.” असे सांगत तिलोत्तमा म्हणाली “ते एका क्षणात चित्रीकरण थांबवू शकले असते, पण त्यांनी थांबवले नाही. त्या दिवशी मला हे शिकायला मिळाले की, एक चांगला सहकलाकार तोच असतो जो आपल्या सहकलाकाराच्या अभिनयाची तितकीच काळजी घेतो.” हा अनुभव अभिनेत्रीने सनी देओलसोबत काम करण्याचा सांगितला.

“सनी सर अत्यंत शांत, संयमी आणि मनमिळावू व्यक्ती आहेत. ते फार कमी बोलतात, पण त्यांच्या वागण्यात आपुलकी जाणवते. त्यामुळे त्यांच्यासोबत काम करताना कधीच अवघडल्यासारखं वाटलं नाही,” असेही तिने सांगितले.

दरम्यान, मुलाखतीत तिने आगामी चित्रपटाबद्दलही उत्सुकता वाढवणारी माहिती दिली. “सध्या मी नव्या चित्रपटाची तयारी करत आहे. या चित्रपटात प्रेक्षकांना माझी अॅक्शन बाजूही पाहायला मिळेल. सध्या यापेक्षा अधिक काही सांगू शकत नाही, पण या भूमिकेबद्दल मी खूप उत्सुक आहे,” असं तिने म्हटलं आहे. त्यामुळे आगामी चित्रपटात तिलोत्तमा शोम कोणती भूमिका करताना बघायला मिळणार याविषयी मोठी उत्सुकता तिच्या चाहत्यांना लागली आहे.

हेही वाचा : Anjali Jathar : शाहरुखसोबत अॅानस्क्रीन रोमान्स; 28 वर्षापूर्वी बॅालिवूडला ठोकला रामराम, आता ही अभिनेत्री काय करते?