Manohar Bhosale : सोलापूरमध्ये भोंदूगिरी आणि आर्थिक फसवणुकीच्या आरोपाखाली अटकेत असलेल्या मनोहर मामा भोसले याला न्यायालयाकडून दिलासा मिळाला आहे. माढा न्यायालयाने त्याची पोलीस कोठडी नाकारत न्यायालयीन कोठडीत रवानगी करण्याचे आदेश दिले. या प्रकरणात त्याचे सहकारी विशाल वाघमारे आणि नरेंद्र सांगळे यांचाही समावेश आहे. (Manohar Bhosale) सरकारी पक्षाकडून सुनावणीदरम्यान भोसले आणि त्याच्या सहकाऱ्यांवर संघटित गुन्हेगारीचे कलम लावण्यात आले. त्यामुळे आता जामिनासाठी त्यांना बार्शी सत्र न्यायालयात अर्ज करावा लागण्याची शक्यता आहे. दरम्यान, करमाळा पोलीस ठाण्यात दाखल असलेल्या दुसऱ्या गुन्ह्यात भोसलेला पुन्हा ताब्यात घेण्यासाठी पोलिस न्यायालयाची परवानगी घेऊ शकतात. तपासादरम्यान भोसलेचा करमाळा तालुक्यातील घोटी येथे 27 एकरांवर पसरलेला आलिशान आश्रम असल्याचे उघड झाले आहे. अमावस्येच्या दिवशी येथे मोठी गर्दी होत असे आणि भेटीसाठी तब्बल 11 हजार रुपये आकारले जात असल्याची माहिती समोर आली आहे. (Manohar Bhosale) या प्रकरणामुळे परिसरात संताप व्यक्त होत असून भोंदूगिरीविरोधात कठोर कारवाई करण्याची मागणी नागरिकांकडून केली जात आहे. सध्या या प्रकरणाचा पुढील तपास सुरू आहे. कोण आहे मनोहर मामा भोसले? (Manohar Bhosale) मनोहर मामा भोसले हा मूळचा इंदापूर तालुक्यातील लासुर्णे गावचा रहिवासी आहे. डीएड परीक्षेत अपयशी ठरल्यानंतर तो काही काळ किरकोळ व्यवसाय करत होता. काही वर्षांनी अचानक ‘संत बाळूमामा प्रसन्न’ असल्याचा दावा करत त्याने भोंदूगिरीला सुरुवात केली. करमाळा तालुक्यातील उंदरगाव परिसरात त्याने मठ उभारला आणि अमावस्या-पौर्णिमेला मोठ्या प्रमाणावर लोकांची गर्दी होऊ लागली. याआधीही त्याच्यावर अत्याचार आणि फसवणुकीचे गुन्हे दाखल असून, विविध आजार बरे करण्याच्या नावाखाली नागरिकांची आर्थिक फसवणूक केल्याचे आरोप आहेत. 2021 मध्ये अनेक गुन्हे नोंद होऊनही त्याची भोंदूगिरी सुरूच असल्याचे समोर आले आहे. (Manohar Bhosale)
