Manohar Bhosale: राज्यात भोंदूबाबांच्या प्रकरणांची चर्चा रंगलेली असतानाच स्वतःला संत बाळूमामाचा अवतार म्हणवून घेणारा स्वयंघोषित अध्यात्मिक गुरु मनोहर भोसले उर्फ ‘मनोहर मामा’ याला सोलापूर पोलिसांनी अटक केली आहे. आर्थिक फसवणूक, भोंदूगिरी आणि महिलांवरील अत्याचारांसारख्या गंभीर आरोपांमध्ये यापूर्वीही गुन्हे दाखल असतानाच, नव्या फसवणूक प्रकरणामुळे तो पुन्हा पोलिसांच्या जाळ्यात अडकला आहे. ‘काळ्या जादूची अघोरी विद्या – या प्रकरणातील फिर्यादीने पोलिसांकडे दिलेल्या तक्रारीत धक्कादायक माहिती उघड केली आहे. २१ एप्रिल २०२६ रोजी रात्री कामानिमित्त कुर्डूवाडी येथे गेलेल्या तक्रारदाराने मित्रासोबत हॉटेलमध्ये जेवताना आपल्या व्यवसायातील अडचणींबाबत चर्चा केली. ही चर्चा ऐकून एक अनोळखी व्यक्ती त्यांच्या जवळ आला आणि ‘तुमच्या आयुष्यात अडचणी आहेत का?’ असा सवाल करत मनोहर मामा भोसले यांची ओळख करून दिली. संबंधित व्यक्तीने मनोहर मामांना ‘काळ्या जादूची अघोरी विद्या अवगत असून ते अडचणी दूर करतात’ असे सांगत त्यांचा मोबाईल नंबर दिला. तक्रारदाराने दिलेल्या नंबरवर संपर्क साधल्यानंतर त्याला दुसऱ्या नंबरवर व्हिडिओ कॉल करण्यास सांगण्यात आले. व्हिडिओ कॉलवर एका व्यक्तीने अघोरी पूजाविधी, जादूटोणा याबाबत माहिती देत मनोहर मामांच्या शक्तीबाबत विश्वास बसवला. ‘जीवनात सुख, शांती आणि पैसा हवा असेल तर सांगितल्याप्रमाणे पूजा करावी लागेल,’ असे सांगून एकूण दोन लाख रुपये खर्च येणार असल्याचे सांगण्यात आले. त्यातील ५० हजार रुपये अॅडव्हान्स स्वरूपात तातडीने भरण्याची अट घालण्यात आली. फसवणूक झाल्याची खात्री – २३ एप्रिल रोजी करमाळा तालुक्यातील निंभोरे येथील मठाजवळ पैसे आणण्यास सांगण्यात आले. तक्रारदार दिलेल्या वेळेनुसार तेथे पोहोचला असता, मठाजवळ उभ्या असलेल्या एका व्यक्तीने स्वतःला मामांच्या वतीने आलेले असल्याचे सांगून त्याच्याकडून ५० हजार रुपये रोख घेतले. मात्र, त्यानंतर पूजाविधीबाबत कोणतीही माहिती न देता तो व्यक्ती तेथून निघून गेला. तक्रारदाराने दिलेल्या सर्व नंबरवर संपर्क साधण्याचा प्रयत्न केला असता, सर्व फोन बंद असल्याचे लक्षात आले. या प्रकारामुळे आपली फसवणूक झाल्याची खात्री झाल्यानंतर तक्रारदाराने पोलिसांत धाव घेतली. मनोहर मामा भोसले, संबंधित मोबाईल क्रमांकधारक आणि अन्य अनोळखी व्यक्तींनी संगनमत करून अघोरी विद्येच्या नावाखाली फसवणूक केल्याचा आरोप तक्रारीत करण्यात आला आहे. कोण आहे मनोहर भोसले ? मनोहर भोसले हा इंदापूर तालुक्यातील लासुर्णे गावचा रहिवासी असून पूर्वी आठवडी बाजारात सुके मासे विकून उदरनिर्वाह करत होता. काही वर्षांपूर्वी अचानक गायब झाल्यानंतर तो परत येऊन स्वतःला संत बाळूमामांचा आशीर्वाद लाभलेला असल्याचे सांगू लागला. करमाळा तालुक्यातील उंदरगाव परिसरात त्याने मठ उभारला आणि अमावस्या-पौर्णिमेला मोठ्या प्रमाणात भक्तांची गर्दी होऊ लागली. अनेक राजकीय नेते व कार्यकर्त्यांशी त्याचे संबंध असल्याची चर्चा देखील स्थानिक पातळीवर आहे. यापूर्वीही महिलांवरील अत्याचार, कर्करोग व मणक्याचे आजार बरे करण्याच्या आमिषाने आर्थिक फसवणूक अशा गंभीर गुन्ह्यांमध्ये त्याच्यावर सोलापूर, बारामती आणि दौंड येथे गुन्हे नोंद झाले आहेत. २०२१ मध्ये तीन गुन्हे दाखल झाल्यानंतरही त्याची भोंदूगिरी सुरूच असल्याचे समोर आले होते. सध्याच्या कारवाईमुळे पुन्हा एकदा अशा भोंदूबाबांच्या कारवायांवर प्रश्नचिन्ह निर्माण झाले असून पोलिसांकडून पुढील तपास सुरू आहे.
