पुणे – आई-वडिल आणि भावाला जीवे ठार मारण्याची धमकी देत १६ वर्षीय अल्पवयीन मुलीवर बलात्कार करणाऱ्याला २० वर्षे सक्तमजुरी आणि ५० हजार रुपये दंडाची शिक्षा न्यायालयाने सुनावली. बाललैंगिक अत्याचार प्रतिबंधिक कायद्याचे (पोस्को) विशेष न्यायाधीश डी.पी.रागीट यांनी हा आदेश दिला. दंडाची रक्कम पीडितेला नुकसान भरपाई म्हणून देण्यात यावी, असेही न्यायालयाने आदेशात म्हटले आहे. रामेश्वर हरिश्चंद्र हंगरगे (वय २०) असे शिक्षा झालेल्याचे नाव आहे.ही घटना सप्टेंबर २०२१ ते १८ मार्च २०२२ या कालावधीत सिंहगड रोड पोलीस स्टेशनच्या हद्दीत नऱ्हे येथे घडली. या प्रकरणात विशेष सरकारी वकील लीना पाठक यांनी काम पाहिले. त्यांना न्यायालय पैरवी अधिकारी सहायक पोलीस उपनिरीक्षक संजय पुणेकर आणि हवालदार डी.एम.गबदुले यांनी न्यायालयीन कामकाजासाठी मदत केली. मुलगी नववीत शिकत होती. मुलीच्या घराच्या शेजारी हंगरगे राहत होता. मुलगी त्याला काका म्हणून ओळखत होती. एके दिवशी घरात घुसून हाताला धरून तो तिला त्याचा घरात घेऊन गेला. कुटुंबियांना जीवे ठार मारण्याची धमकी देत तिच्यावर बलात्कार केला. त्यानंतर तो वारंवार हे कृत्य करत होता. त्याच्या त्रासाला कंटाळून घडलेल्या घटनेबाबत पीडितेने आई-वडिलांना सांगितले. हा गुन्हा उघडकीस आला. सिंहगड रोड पोलिसांनी या प्रकरणात तपास करून दोषारोपपत्र केले. यावर सुनावणी करत न्यायालयाने शिक्षा सुनावली.
