Malshej Ghat Hydroelectric Project : जुन्नर विधानसभा मतदारसंघातील अदानी ग्रीन एनर्जी कंपनीच्या माध्यमातून प्रस्तावित करण्यात आलेल्या माळशेज घाट-भोरांडे जलविद्युत प्रकल्पाच्या पार्श्वभूमीवर पर्यावरणीय व सामाजिक परिणामांची माहिती उपलब्ध करून देण्यासाठी शुक्रवार, दि. 14 रोजी अजनावळे येथे तातडीच्या बैठकीचे आयोजन करण्यात आले आहे.

जुन्नरचे आमदार शरद सोनवणे यांच्या अध्यक्षतेखाली ही बैठक होणार असल्याची माहिती तहसीलदार रणजीत भोसले यांनी दिली. ही बैठक दि. 14 रोजी सकाळी 11 वाजता अजनावळे येथील शासकीय आश्रमशाळेत आयोजित करण्यात आली आहे. या बैठकीस संबंधित गावांतील ग्रामपंचायतींचे सरपंच, सदस्य, आजी-माजी लोकप्रतिनिधी, स्थानिक आदिवासी समाजबांधव, शेतकरी तसेच ग्रामस्थांनी मोठ्या संख्येने उपस्थित राहावे,

असे आवाहन महसूल विभागाच्या वतीने करण्यात आले आहे. या तातडीच्या बैठकीत प्रस्तावित प्रकल्पाची संपूर्ण माहिती देण्यात येणार असून, पर्यावरणावरील परिणाम, वनक्षेत्रावर होणारा परिणाम, स्थानिक नागरिकांचे हक्क, जमीन व उपजीविकेवरील परिणाम तसेच पुनर्वसन आणि इतर संबंधित बाबींवर सविस्तर चर्चा करण्यात येणार आहे. विशेषतः स्थानिक ग्रामस्थांच्या शंका, हरकती आणि सूचना जाणून घेऊन आगामी पर्यावरण सुनावणीच्या पार्श्वभूमीवर त्यांना आवश्यक माहिती उपलब्ध करून देण्याच्या दृष्टीने या बैठकीला महत्त्व प्राप्त झाले आहे.

14 गावांचा प्रकल्पाशी संबंध
अदानी ग्रीन एनर्जी कंपनीमार्फत प्रस्तावित करण्यात आलेल्या या जलविद्युत प्रकल्पाचा परिसर तळेरान, घाटघर, अजनावळे, देवळे, खटकाळे, निमगिरी, आंबोली, जळवंडी, केवाडी, भिवाडे, हातवीज, इंगळून, आंबे आणि सोनावळे आदी गावांशी संबंधित असल्याचे प्रशासनाकडून सांगण्यात आले आहे. त्यामुळे या प्रकल्पाचा स्थानिक नागरिक, शेतकरी आणि आदिवासी समाजावर होणारा परिणाम, तसेच प्रकल्पासाठी आवश्यक असलेल्या जमिनी व नैसर्गिक साधनसंपत्तीच्या वापराबाबत ग्रामस्थांमध्ये विविध प्रश्न उपस्थित होत आहेत.