Malegaon Election Results : राज्याचे लक्ष लागून राहिलेल्या बारामती तालुक्यातील माळेगाव सहकारी साखर कारखाना निवडणुकीच्या मतमोजणीला मंगळवारी सुरूवात झाली. मध्यरात्री दीड वाजता पहिल्या फेरीची मतमोजणी प्रक्रिया पूर्ण झाली असून आता दुपारी बारा ते एक वाजेपर्यंत संपूर्ण निकाल हाती येणार अशी शक्यता आहे.

‘ब’ वर्गातून उपमुख्यमंत्री अजित पवार हे विजयी झाले असून आतापर्यंतचे कल पाहता अजित पवार यांच्या नीलंकठेश्वर पॅनलच्या उमेदवारांना यश मिळताना दिसत आहे. या पॅनलच्या १६ उमेदवारांनी आघाडी घेतली आहे. तर सहकार बचाव पॅनलचे चार उमेदवार पहिल्या फेरीमध्ये आघाडीवर आहेत.

यामुळे अजित पवार माळेगाव कारखानाच्या निवडणुकीत २१ पैकी किती जागा जिंकणार याकडे सर्वांचे लक्ष लागलेले आहे. दुपारी बारा ते एक वाजेपर्यंत अंतिम निकाल येणार असल्याची शक्यता असल्याने आता निकाल काय लागणार याची उत्सुकता सर्वांना लागली आहे.

काल मंगळवारी माळेगाव सहकारी साखर कारखानाच्या मतमोजणीला सुरुवात झाल्यानंतर निवडणुकीत मोठ्या प्रमाणावर क्राॅस व्होटिंग झाल्याची बाब समोर आली होती. आता या क्रॅास व्होटिंगचा फटका नेमका कोणाला बसणार हे पाहणे महत्वाचे असणार आहे. २२ जून २०२५ रोजी माळेगाव साखर कारखान्याची निवडणुकीची मतदान प्रक्रिया पार पडली.

अजित पवारांचे निळकंठेश्वर पॅनेल, शरद पवारांच्या नेतृत्वाखाली बळिराजा सहकार बचाव पॅनेल, चंद्रराव तावरे- रंजन तावरे यांचे सहकार बचाव आणि शेतकरी पॅनेल आणि कष्टकरी शेतकरी समिती, अपक्षांचे एक पॅनेल, अशी चार पॅनेल निवडणुकीच्या रिंगणात होती.

विविध नाट्यमय घडामोडींनी चर्चेत

माळेगाव सहकारी साखर कारखान्याची निवडणूक उपमुख्यमंत्री अजित पवार यांनी प्रतिष्ठेची केली होती. उमेदवारांसाठी ते स्वतः प्रचार सभा घेत होते. राज्याचे अजित पवार हे उपमुख्यमंत्री असल्याने अर्थखाते त्यांच्याकडे आहे, म्हणजेच राज्याच्या तिजोरीच्या चाव्या त्यांच्या हाती आहेत. अजित पवार यांनी कारखान्याला ५०० कोटी रुपयांची आर्थिक मद देतण्याचे आश्वासन दिले होते. तसेच ही निवडणूक विविध नाट्यमय घडामोडींनी चर्चेत राहिली होती.

हेही वाचा : अकरावीचा कट ऑफ उद्या जाहीर होणार