Cold Coffee: उन्हाळ्यात थंडगार पेय पिण्याची मजा काही वेगळीच असते. अनेकांना चहा किंवा गरम कॉफीपेक्षा कोल्ड कॉफी अधिक आवडते. कॅफेमध्ये मिळणारी क्रीमी, फेसाळ आणि चॉकलेटी कोल्ड कॉफी पाहून ती घरी बनवणे कठीण वाटते. मात्र, योग्य प्रमाण आणि सोपी पद्धत वापरली तर घरच्या घरीही अगदी कॅफेसारखी टेस्टी कोल्ड कॉफी तयार करता येते.

ही कोल्ड कॉफी  (Cold Coffee) बनवण्यासाठी फार वेळ लागत नाही. काही साध्या साहित्याच्या मदतीने तुम्ही काही मिनिटांत थंडगार आणि रिफ्रेशिंग ड्रिंक तयार करू शकता. विशेष म्हणजे ही कॉफी मुलांपासून मोठ्यांपर्यंत सर्वांनाच आवडते.

कोल्ड कॉफीसाठी लागणारे साहित्य  (Cold Coffee)

• २ कप फुल क्रीम दूध
• २ मोठे चमचे कॉफी पावडर
• २ मोठे चमचे साखर
• २ मोठे चमचे गरम पाणी
• ७ ते ८ बर्फाचे तुकडे
• १ स्कूप व्हॅनिला आईस्क्रीम
• चॉकलेट सिरप

कोल्ड कॉफी बनवण्याची पद्धत   (Cold Coffee)

सर्वप्रथम एका कपमध्ये कॉफी पावडर, साखर आणि गरम पाणी घ्या. गरम पाण्यामुळे कॉफी आणि साखर चांगली मिसळते. आता हे मिश्रण चमचा किंवा इलेक्ट्रिक मिक्सरच्या मदतीने काही मिनिटे फेटा.

हे मिश्रण फेटताना त्याचा रंग गडद तपकिरीवरून हलका तपकिरी होतो आणि त्याला क्रीमी व फेसाळ टेक्स्चर येते. हीच परफेक्ट कोल्ड कॉफीची खास ट्रिक मानली जाते.

यानंतर एका उंच ग्लासमध्ये चॉकलेट सिरप लावून ग्लास सजवा. त्यात बर्फाचे तुकडे घाला आणि थंड दूध ओता. आता तयार केलेले क्रीमी कॉफी मिश्रण त्यावर घाला आणि हलक्या हाताने मिक्स करा.

शेवटी वरून व्हॅनिला आईस्क्रीम घालून चॉकलेट सिरप किंवा दालचिनी पावडरने सजावट करा. तुमची थंडगार आणि फेसाळ कोल्ड कॉफी तयार आहे.

परफेक्ट कोल्ड कॉफीसाठी काही खास टिप्स

जर तुम्हाला अधिक घट्ट आणि स्मूदीसारखा टेक्स्चर हवा असेल तर दुधाचे प्रमाण थोडे कमी ठेवा. अधिक क्रीमी फ्लेवरसाठी एक चमचा पीनट बटरही घालू शकता.

उन्हाळ्यात ही आइस्ड कॉफी खूप रिफ्रेशिंग वाटते. कॉफीमध्ये असलेले कॅफीन शरीराला ऊर्जा देण्यास मदत करते. तसेच कॉफीचा सुगंध मूड फ्रेश ठेवण्यासही फायदेशीर मानला जातो.

घरच्या घरी तयार केलेली ही कोल्ड कॉफी कमी खर्चात आणि सहज बनते. त्यामुळे आता कॅफेमध्ये जाण्याऐवजी तुम्ही घरीच स्टारबक्स स्टाईल कोल्ड कॉफीचा आनंद घेऊ शकता.