नागपूर – शालार्थ आयडी घोटाळा आणि अपात्र शिक्षक भरती प्रकरणी राज्य शिक्षण मंडळाचे विभागीय अध्यक्ष व माजी शिक्षण उपसंचालक चिंतामण वंजारी यांना अटक करण्यात आली आहे. वंजारी हे या प्रकरणाच्या चौकशी समितीचे अध्यक्ष होते. या घोटाळ्यात बोगस शालार्थ आयडी तयार करून अपात्र शिक्षकांना वेतन मंजूर केल्याचा आरोप आहे. वंजारी प्राथमिक शिक्षणाधिकारी असताना घोटाळ्याला सुरूवात झाली होती असे तपासात उघड झाले आहे.

बुधवारी अटक करून लगेच जामीन मिळालेले माजी शिक्षण उपसंचालक अनिल पारधी यांनी वंजारी यांचे नाव घेतल्याने त्यांना अटक करण्यात आली. या प्रकरणी आतापर्यत एकूण १३ जणांना अटक करण्यात आली असून त्यातील पाच ते सहा जण जामिनावर बाहेर आले आहेत.

वंजारी हे नागपूर विभागीय शिक्षण उपसंचालक म्हणून कार्यरत होते. या घोटाळ्याच्या तपासासाठी २०२४ मध्ये वंजारी यांच्या अध्यक्षतेखाली एकसदस्यीय समिती नेमण्यात आली होती. समितीने १२ फेब्रुवारी २०२४ रोजी अहवाल सादर केला. यात ५८० बनावट शालार्थ आयडी तयार करून अपात्र शिक्षकांना वेतन मंजूर केल्याचा ठपका ठेवण्यात आला होता.