प्रभात वृत्तसेवा कृष्णानगर – जिल्हा परिषदेचे माजी सदस्य संदीप शिंदे यांना खेडसाठी सेवेची संधी द्यावी, अशी साद कृष्णा खोरे विकास महामंडळाचे उपाध्यक्ष ना. महेश शिंदे यांनी खेडवासियांना घातली. येत्या काळात खेड ग्रामपंचायत नगरपंचायतीमध्ये परिवर्तित करणार असल्याचे त्यांनी सांगितले.खेड ग्रामपंचायतीच्या प्रांगणात ना. महेश शिंदे यांच्या हस्ते विविध विकासकामांचा लोकार्पण सोहळा पार पडला. यामध्ये गटारे, ट्रिमिक्स काँक्रिट रस्ते, सीसीटीव्ही अशा विविध कामांचा समावेश होता. ना. महेश शिंदे यांनी खेड गटातून जिल्हा परिषदेसाठी संदीप शिंदे यांची उमेदवारी जाहीर केली. त्यावेळी ते बोलत होते. आ. महेश शिंदे म्हणाले, ‘‘विरोधकांनी बोगस कामे करून सामान्य जनतेची लूट केली असून गेल्या 40 वर्षांमध्ये विकास कामाच्या नावाखाली सामान्य जनतेस धमकावणे त्रास देणे, गुंडगिरी करून आपली घरे भरली. खेडच्या जनतेने अनेक वर्षे गुंडगिरी सहन केली. परंतु, आम्ही त्यांचा संपूर्ण नायनाट केला. त्यामुळे आगामी काळात ही गुंडगिरी कायमची संपवायची असेल तर संदीप शिंदे यांना प्रचंड मताने निवडून देण्याचे आवाहन त्यांनी केले. तसेचसंदीप शिंदे यांनी विरोधकांवर हल्लाबोल केला. ते म्हणाले, ‘‘माझ्या पत्नी वनवासवाडी भागाची जिल्हा परिषद सदस्य होत्या. संपूर्ण खेडचे रस्ते चिखलमय होते. विकासकामे फक्त कागदावरच होती. गुन्हेगारी आणि गुंडांची दहशत प्रचंड होती. पण आज त्या सर्वांचा बिमोड करण्यात आ. महेश शिंदे यांचा सिंहाचा वाटा आहे. करोना काळात विरोधक मुंबईला पळून गेले. पण आ. शिंदे यांनी त्या काळात जनतेसाठी ११ कोटी रुपये खर्ची घातले. विरोधक मतदारांची दिशाभूल करत आहेत. परंतु, सूज्ञ मतदार त्यांना त्यांची जागा दाखवतील यात शंका नाही.’’ ना. महेश शिंदे यांच्या हस्ते पालिकेचे नवनिर्वाचित सदस्य शांताताई कोळी, मयूर कांबळे, संकेत साठे, जयश्री जाधव यांचा सत्कार करण्यात आला. कार्यक्रमास खेड ग्रामपंचायतीच्या लोकनियुक्त सरपंच सौ. लता फरांदे, उपसरपंच विनोद माने, सदस्य सौ. सुषमा लोखंडे, सौ. वंदना गायकवाड, संतोष शिंदे, शामराव कोळपे, सौ. स्मिता शिंदे, सौ. शोभा गायकवाड तसेच भाजप तालुकाध्यक्ष नीलेश नलावडे, खेड बूथ अध्यक्ष दादा गायकवाड, त्याचबरोबर माजी सदस्य उपस्थित होते.
