महाराष्ट्राचे पोलीस महासंचालक बदलले; सदानंद दाते बनले नवे डीजीपी राज्य सरकारने वरिष्ठ आयपीएस अधिकारी आणि एनआयएचे (NIA) माजी प्रमुख सदानंद दाते यांची महाराष्ट्राच्या पोलीस महासंचालकपदी (DGP) नियुक्ती केली आहे. विद्यमान डीजीपी रश्मी शुक्ला यांचा कार्यकाळ ३१ डिसेंबर रोजी संपत असल्याने, सरकारने बुधवारी याबाबतचे अधिकृत आदेश जारी केले. १९९० च्या बॅचचे आयपीएस अधिकारी असलेले दाते यांनी मुंबई पोलीस दलात विविध महत्त्वाची पदे भूषवली आहेत. २६/११ च्या मुंबई दहशतवादी हल्ल्यावेळी कामा रुग्णालयात अजमल कसाब आणि त्याच्या साथीदारांशी त्यांनी निकराने लढा दिला होता. या शौर्याबद्दल त्यांना राष्ट्रपती पोलीस पदक देऊन गौरविण्यात आले होते. दाते यांचा कार्यकाळ २०२७ अखेरपर्यंत असणार आहे. त्यांच्या अनुभवाचा राज्याच्या कायदा-सुव्यवस्थेला मोठा लाभ होईल, असा विश्वास व्यक्त केला जातोय. नाशिक-सोलापूर-अक्कलकोट कॉरिडॉरला मंजुरी; 9 तासांचे अंतर 4 तासांवर केंद्र सरकारने महाराष्ट्रासाठी महत्त्वाकांक्षी अशा नाशिक-सोलापूर-अक्कलकोट सहा पदरी ग्रीनफिल्ड हायवेला मंजुरी दिली आहे. पंतप्रधान मोदींच्या अध्यक्षतेखालील समितीने या १९,१४२ कोटी रुपयांच्या प्रकल्पावर शिक्कामोर्तब केले. हा महामार्ग सुरत-चेन्नई इकॉनॉमिक कॉरिडॉरचा भाग असून, तो अहिल्यानगर आणि धाराशिवमार्गे जाणार आहे. या ३७४ किमी लांबीच्या महामार्गामुळे नाशिक ते अक्कलकोट हे ९ तासांचे अंतर आता अवघ्या ४ तासांत कापणे शक्य होईल. हा प्रकल्प ‘बांधा-वापरा-हस्तांतरित करा’ (BOT) तत्त्वावर राबवला जाणार असून, पुढील दोन वर्षांत तो पूर्ण करण्याचे उद्दिष्ट आहे. यामुळे दक्षिण आणि पश्चिम भारताची कनेक्टिव्हिटी सुधारून विकासाला मोठी गती मिळणार आहे. शेअर बाजारात वर्षाअखेर तेजीचा धमाका; गुंतवणूकदारांची 4 लाख कोटींची कमाई भारतीय शेअर बाजाराने २०२५ वर्षाचा निरोप वाढीसह घेतलाय. वर्षाच्या शेवटच्या दिवशी मुंबई शेअर बाजाराचा सेंसेक्स ५४५ अंकांनी वधारून ८५,२२० वर बंद झाला, तर निफ्टी १९० अंकांच्या तेजीसह २६,१२९ वर स्थिरावला. केंद्र सरकारने स्टील क्षेत्रासाठी घेतलेल्या सकारात्मक निर्णयामुळे टाटा स्टीलसह मेटल कंपन्यांच्या शेअर्समध्ये मोठी खरेदी झाली. या तेजीमुळे गुंतवणूकदारांच्या संपत्तीत एकाच दिवसात सुमारे ४ लाख कोटी रुपयांची भर पडली. आयटी क्षेत्र वगळता तेल, बँकिंग आणि ऊर्जा क्षेत्रातील शेअर्सनी बाजाराला सावरले. एकूणच, गुंतवणूकदारांसाठी वर्षाचा शेवट गोड झाला असून बाजारात उत्साहाचे वातावरण आहे. DRDO चा ऐतिहासिक पराक्रम; दोन ‘प्रलय’ क्षेपणास्त्रांची यशस्वी चाचणी भारतीय संरक्षण संशोधन आणि विकास संस्थेने (DRDO) बुधवारी ओडिशाच्या तटवर्ती भागातून ‘प्रलय’ या स्वदेशी क्षेपणास्त्रांची ऐतिहासिक ‘साल्वो’ चाचणी यशस्वी केली. एकाच लाँचरवरून दोन क्षेपणास्त्रे लागोपाठ डागून डीआरडीओने आपली ताकद सिद्ध केलीय. ही चाचणी युजर इव्हॅल्युएशन ट्रायलचा भाग होती. ‘प्रलय‘ हे सॉलिड प्रोपेलेंटवर आधारित क्वासी-बैलिस्टिक क्षेपणास्त्र असून ते अत्याधुनिक नेव्हिगेशन यंत्रणेने सज्ज आहे. या दोन्ही क्षेपणास्त्रांनी निर्धारित लक्ष्याचा अचूक वेध घेत सर्व निकष पूर्ण केले. या यशामुळे भारताची संरक्षण सज्जता आणि पारंपरिक लष्करी प्रतिकार क्षमता अधिक मजबूत झालीय. ह्युंदाई क्रेटाचा भारतीय बाजारपेठेवर दबदबा; वर्षभरात २ लाख विक्रीचा ऐतिहासिक टप्पा पार ह्युंदाई मोटर इंडियाच्या ‘क्रेटा’ या लोकप्रिय मॉडेलने २०२५ या वर्षात विक्रीचा नवा विक्रम प्रस्थापित केलाय. एकाच वर्षात २ लाख युनिट्स विक्रीचा टप्पा ओलांडणारी क्रेटा ही देशातील पहिली मिड-साईज SUV ठरलीय. विशेष म्हणजे, कंपनीने वर्षभरात दररोज सरासरी ५५० गाड्यांची विक्री केली. मिड-साईज SUV सेगमेंटमध्ये ३४% पेक्षा जास्त हिस्सा मिळवत क्रेटाने आपले वर्चस्व सिद्ध केलेय. कंपनीचे एमडी तरुण गर्ग यांनी या यशाचे श्रेय ग्राहकांच्या विश्वासाला दिले. आकडेवारीनुसार, सनरूफ असलेल्या व्हेरिएंटला ७०% तर डिझेल इंजिनला ४४% ग्राहकांनी पसंती दिली. सध्या क्रेटा पेट्रोल, डिझेल आणि इलेक्ट्रिक अशा तिन्ही पर्यायांत उपलब्ध असून, प्रथमच कार खरेदी करणाऱ्यांच्या संख्येतही ३२% वाढ झालीय. तिसरे महायुद्ध आणि पुतिन यांच्या सत्तेला धोका? बाबा वेंगा अन् नास्त्रेदमस २०२६साठी भविष्यवाणी आगामी २०२६ वर्ष जगासाठी अत्यंत उलथापालथीचे ठरणार असल्याचे संकेत प्रसिद्ध भविष्यवेत्ते बाबा वेंगा आणि नास्त्रेदमस यांच्या भाकितातून मिळत आहेत. यानुसार, २०२६ मध्ये तिसऱ्या महायुद्धाचा धोका असून अमेरिका, रशिया आणि चीन यांसारखे देश संघर्षात ओढले जातील. बाबा वेंगा यांच्या दाव्यानुसार, रशियन राष्ट्राध्यक्ष पुतिन यांच्या सत्तेचा अंत होऊन एका नव्या ‘मास्टर’चा उदय होऊ शकतो. तसेच, पृथ्वीचा परग्रहावरील लोकांशी संपर्क येण्याची शक्यताही वर्तवण्यात आलीय. दुसरीकडे, नास्त्रेदमस यांनी सात महिने चालणाऱ्या भीषण युद्धाचे आणि मधमाश्यांच्या माध्यमातून पसरणाऱ्या एका गूढ महामारीचे भाकीत केलेय. ब्राझिलचे भविष्यवेत्ता एथोस सलोम यांनीही नाटो आणि रशियामधील प्रत्यक्ष युद्धासह जागतिक अर्थव्यवस्थेत डॉलरचे वर्चस्व कमी होण्याचे संकेत दिलेत. २०२६ चे जल्लोषात स्वागत, न्यूझीलंडमध्ये आतिशबाजी; किरिबाती हा देश ठरला पहिला जगभरात वर्ष २०२६ चे उत्साहात स्वागत करण्यात आले असून, न्यूझीलंड हा नवीन वर्षाचे स्वागत करणारा जगातील दुसरा देश ठरलाय. ऑकलंडमधील प्रसिद्ध ‘स्काय टॉवर’वर ३,५०० पेक्षा अधिक शोभेच्या दारूची नयनरम्य आतिशबाजी करण्यात आली. हे दृष्य पाहण्यासाठी हजारो पर्यटकांनी गर्दी केली होती. प्रशांत महासागरातील किरिबाती (किरीतिमाती बेट) हा २०२६ चे स्वागत करणारा जगातील पहिला देश ठरलाय. भारतीय वेळेनुसार दुपारी ३:३० वाजता तिथे नवीन वर्षाची सुरुवात झाली, तर न्यूझीलंडमध्ये ४:३० वाजता जल्लोष सुरू झाला. यानंतर ऑस्ट्रेलिया, जपान आणि रात्री १२ वाजता भारतात नवीन वर्षाचे आगमन होईल. अमेरिकेत उद्या सकाळी १०:३० वाजता (IST) वर्षाची पहिली पहाट होईल. चांदीच्या दरात १९,००० रुपयांची घसरण; वर्षाच्या शेवटच्या दिवशी गुंतवणूकदारांना झटका वर्ष २०२५ मध्ये सातत्याने तेजी अनुभवल्यानंतर, वर्षाच्या अखेरच्या दिवशी सोने आणि चांदीच्या बाजारात मोठी घसरण पाहायला मिळाली. विशेषतः चांदीच्या दरात ९ टक्क्यांची मोठी कपात झाली असून, प्रति किलोमागे तब्बल १९,००० रुपयांची घसरण नोंदवण्यात आली. यामुळे मार्च २०२६ च्या वायदा बाजारात चांदीचा भाव २,३२,२२८ रुपये प्रति किलोवर खाली आलाय. सोने देखील ७८२ रुपयांनी स्वस्त होऊन १,३५,८८४ रुपये प्रति १० ग्रॅमवर पोहोचले. जागतिक बाजारात भू-राजकीय तणाव निवळणे आणि अमेरिकन फेडरल रिझर्व्हने व्याजदर कपातीबाबत दिलेल्या संकेतांनंतर गुंतवणूकदारांनी मोठ्या प्रमाणावर ‘नफावसुली’ केल्यामुळे ही घसरण झाली. वर्षभर सोन्या-चांदीने दिलेला ऐतिहासिक परतावा पाहता, वर्षाअखेरची ही घसरण बाजारातील स्थिरता दर्शवत असल्याचे तज्ज्ञांचे मत आहे. KBC 17मध्ये रांचीचे विप्लब विश्वास झाले करोडपती; ‘स्टॅच्यू ऑफ लिबर्टी’च्या प्रश्नावर मारली बाजी प्रसिद्ध क्विझ शो ‘कोण बनेगा करोडपती’च्या १७ व्या पर्वाला आपला नवा करोडपती मिळालाय. झारखंडची राजधानी रांची येथील विप्लब विश्वास यांनी आपल्या अफाट ज्ञानाच्या जोरावर १ कोटी रुपये जिंकून इतिहास रचलाय. विप्लब हे सध्या छत्तीसगडमधील बीजापूर येथे CRPF मध्ये इन्स्पेक्टर म्हणून कार्यरत आहेत. त्यांच्या आत्मविश्वासाने खुद्द अमिताभ बच्चन यांनाही थक्क केले. १ कोटी रुपयांसाठी त्यांना ‘फ्रान्समधून अमेरिकेत स्टॅच्यू ऑफ लिबर्टी वाहून नेणाऱ्या जहाजाचे नाव काय होते?’ हा प्रश्न विचारण्यात आला होता. विप्लब यांनी कोणतीही वेळ न घालवता ‘इसेरे’ (Isère) हे अचूक उत्तर देऊन १ कोटींच्या बक्षीसावर नाव कोरले. या विजयासोबतच त्यांना एक आलिशान कारही भेट मिळाली असून, आता संपूर्ण देशाचे लक्ष त्यांच्या ७ कोटींच्या प्रश्नाकडे लागलेय. सर्फराझ खानने मोडला रोहित शर्माचा विक्रम; विजय हजारे ट्रॉफीमध्ये अवघ्या ५६ चेंडूंत शतक विजय हजारे ट्रॉफीमध्ये गोव्याविरुद्ध खेळताना मुंबईच्या सर्फराझ खानने ऐतिहासिक कामगिरी केली आहे. सर्फराझने अवघ्या ५६ चेंडूंत शतक ठोकत रोहित शर्माचा (६२ चेंडू) मुंबईसाठी सर्वात वेगवान लिस्ट-A शतकाचा विक्रम मोडीत काढला. त्याने एकूण ७५ चेंडूंत १५७ धावांची आतिशी खेळी केली, ज्यात १४ षटकारांचा समावेश होता. त्याला भाऊ मुशीर खान (६० धावा) याने मोलाची साथ दिली. या दोघांच्या फटकेबाजीमुळे मुंबईने ४४४ धावांचा विशाल धावसंख्या उभारली. अलीकडेच फिटनेसमध्ये सुधारणा केलेल्या सर्फराझला त्याच्या जबरदस्त फॉर्ममुळे आगामी आयपीएलसाठी चेन्नई सुपर किंग्सने (CSK) करारबद्ध केले आहे.
