Maharashtra Rain Alert : गेल्या महिन्याभरात राज्यात जोरदार पाऊस कोसळल्यानंतर सप्टेंबरच्या पहिल्या आठवड्यात पावसाचा जोर काहीसा कमी झाला होता. मात्र, आता पुन्हा एकदा पावसाने हजेरी लावणार असून, विदर्भ, मराठवाडा आणि दक्षिण मध्य महाराष्ट्रात मुसळधार पावसाचा इशारा हवामान विभागाने दिला आहे. पुढील तीन ते चार दिवसांत राज्यभर पावसाला पोषक वातावरण निर्माण झाले असून, हवामान विभागाने पुढील पाच दिवसांसाठी विविध जिल्ह्यांना येलो अलर्ट जारी केला आहे.

आज कुठे पाऊस?
हवामान विभागाच्या अंदाजानुसार, आज (१० सप्टेंबर) सातारा, सांगली, सोलापूर तसेच मराठवाड्यातील धाराशिव, लातूर, परभणी, हिंगोली आणि नांदेड जिल्ह्यांत जोरदार पावसाची शक्यता आहे. मराठवाड्यातील बहुतांश भागात पावसाचा जोर कायम राहणार आहे. अरबी समुद्राच्या ईशान्य भागात कमी दाबाचा पट्टा सक्रिय असून, तो हळूहळू पश्चिमेकडे सरकत आहे. तसेच, बंगालच्या उपसागरातही पावसासाठी अनुकूल वातावरण तयार होत आहे. यामुळे मध्य महाराष्ट्र, मराठवाडा आणि विदर्भात वादळी वाऱ्यासह पाऊस पडेल, असा अंदाज आहे. वाऱ्याचा वेग ताशी ४० ते ६० किमी राहण्याची शक्यता आहे.

पुढील पाच दिवसांचा हवामान अंदाज –
हवामान विभागाने पुढील पाच दिवसांसाठी येलो अलर्ट जारी केला आहे. यामध्ये खालील जिल्ह्यांचा समावेश आहे:

१० सप्टेंबर: अमरावती, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली, हिंगोली, परभणी, नांदेड, लातूर, धाराशिव, सोलापूर, सातारा, सांगली.

११ सप्टेंबर: सांगली, सातारा, सोलापूर, धाराशिव, लातूर, परभणी, नांदेड, हिंगोली, वाशिम, यवतमाळ, वर्धा, नागपूर, चंद्रपूर, भंडारा, गोंदिया, गडचिरोली.

१२ सप्टेंबर: पुणे, नगर, सातारा, सांगली, सोलापूर, धाराशिव, बीड, लातूर, परभणी, नांदेड, हिंगोली आणि संपूर्ण विदर्भ.

१३ सप्टेंबर: मुंबई, ठाणे, रायगड, रत्नागिरी, पुणे, सातारा, सांगली, सोलापूर, नगर, धाराशिव, लातूर, बीड, परभणी, नांदेड, हिंगोली आणि संपूर्ण विदर्भ.

१४ सप्टेंबर: मुंबई, ठाणे, रायगड, रत्नागिरी, सिंधुदुर्ग, पुणे, कोल्हापूर, सांगली, सातारा, सोलापूर, नगर, नाशिक, छत्रपती संभाजीनगर, जालना, बीड, धाराशिव, लातूर, परभणी, नांदेड, हिंगोली, बुलढाणा, अकोला, अमरावती, वर्धा, यवतमाळ, वाशिम.

पावसाचा जोर वाढणार –
पुढील पाचही दिवस राज्यात विविध ठिकाणी पावसाचा येलो अलर्ट देण्यात आला आहे. विशेषत: मराठवाड्यात पावसाचा जोर वाढण्याची शक्यता आहे, तर उर्वरित भागात ढगाळ वातावरण राहील. नागरिकांना सतर्क राहण्याचे आणि आवश्यक खबरदारी घेण्याचे आवाहन हवामान विभागाने केले आहे.