वाघोली : महाराष्ट्र राज्य कुस्तीगीर संघ यांच्या मान्यतेने रामकृष्ण सातव पाटील यांच्या पुढाकारातून 68वी महाराष्ट्र केसरी 2025-26 स्पर्धा वाघोली (पुणे) येथे 18 ते 22 मार्चदरम्यान आयोजित करण्यात आली आहे. या स्पर्धेच्या वासापूजन व मातीपूजन सोमवारी (2 मार्च) सकाळी 10 वाजता केंद्रीय राज्यमंत्री मुरलीधर मोहोळ यांच्या हस्ते पार पडले. यंदाच्या स्पर्धेत प्रथमच महाराष्ट्र केसरी विजेत्या पैलवानास टोयोटा फॉर्च्यूनर तर उपमहाराष्ट्र केसरी विजेत्यास स्कॉर्पिओ-एन ही गाडी किताब म्हणून देण्यात येणार आहे. या गाड्यांचे अनावरणही मान्यवरांच्या हस्ते करण्यात आले. कार्यक्रमात बोलताना मुरलीधर मोहोळ म्हणाले, रामकृष्ण सातव पाटील यांनी वासापूजन व मातीपूजन समारंभ अत्यंत भव्य स्वरूपात आयोजित केला आहे. यावरूनच स्पर्धेची भव्यता लक्षात येते. महाराष्ट्र केसरीच्या इतिहासातील आजवरची सर्वात मोठी स्पर्धा यावेळी होणार आहे. कुस्ती वाढली पाहिजे, महाराष्ट्राच्या मातीतील खेळाडूंमधून आणखी खाशाबा जाधव घडले पाहिजेत, हा आयोजकांचा प्रामाणिक हेतू आहे. ते पुढे म्हणाले की, स्व. मामासाहेब मोहोळ यांनी सुरू केलेली ही परंपरा गेली 67 वर्षे अखंड सुरू आहे. कुस्तीपटूंनी राष्ट्रीय व आंतरराष्ट्रीय स्तरावर पोहोचावे, हा या स्पर्धेमागील उद्देश आहे. लाल मातीशी आमचे नाते कायम राहील. समारंभास महाराष्ट्र राज्य कुस्तीगीर संघाचे अध्यक्ष रामदास तडस, सरचिटणीस योगेश दोडके, पुणे जिल्हा कुस्तीगीर संघाचे अध्यक्ष मेघराज कटके, आमदार बापूसाहेब पठारे, महाराष्ट्र केसरी दत्ता गायकवाड, मल्लसम्राट अस्लम काझी यांच्यासह विविध मान्यवर उपस्थित होते. भव्य आयोजन, आकर्षक पारितोषिके आणि राज्यभरातील पैलवानांचा सहभाग यामुळे यंदाची महाराष्ट्र केसरी स्पर्धा ऐतिहासिक ठरणार असल्याची चर्चा कुस्तीविश्वात रंगली आहे. सर्व जिल्ह्यांतील मातीने आखाड्याची निर्मिती राज्यातील सर्व जिल्हा कुस्ती संघांकडून माती आणून तिचे पूजन करण्यात आले. त्यामधून स्पर्धेच्या आखाड्याची निर्मिती होणार आहे. आज ट्रेलर पाहिला, पिक्चर मोठा असणार, असे म्हणत मोहोळ यांनी आयोजनाचे कौतुक केले. क्रीडानगरीला ‘अजितदादा पवार’ नाव आपल्या भाषणात मोहोळ यांनी महाराष्ट्राचे उपमुख्यमंत्री अजित पवार यांच्या निधनाबद्दल दुःख व्यक्त केले. महाराष्ट्र केसरी स्पर्धेच्या क्रीडानगरीला दिवंगत अजितदादा पवार यांचे नाव देण्यात येत असल्याची घोषणा त्यांनी केली. तसेच बक्षीस वितरण समारंभाला मुख्यमंत्री देवेंद्र फडणवीस उपस्थित राहणार असल्याचेही सांगितले.
