Mahabaleshwar News – टंचाईग्रस्त गावांमध्ये पिण्याच्या पाण्याची समस्या लक्षात घेऊन संबंधित गावांना पदाधिकारी व अधिकाऱ्यांनी प्रत्यक्ष भेट देऊन नागरिकांच्या समस्या जाणून घेऊन तातडीने कार्यवाही करण्याच्या सूचना महाबळेश्वर पंचायत समितीच्या सर्वसाधारण सभेत देण्यात आल्या. अध्यक्षस्थानी सभापती सौ. शकुंतला चोरमले होत्या. या सभेस उपसभापती संजय मोरे, पंचायत समिती सदस्य संजय शेलार, सौ. वंदना भिलारे, गट विकास अधिकारी तथा सचिव विजय विभुते यांच्यासह सर्व खातेप्रमुख अधिकारी व कर्मचारी उपस्थित होते. प्रारंभी सचिव तथा गटविकास अधिकारी विजय विभुते यांनी स्वागत केले. यानंतर विविध विषयांवर चर्चा करून ठराव मंजूर करण्यात आले. सभेत पंचायत समितीच्या नव्या पदाधिकाऱ्यांची बिनविरोध निवड झाल्याबद्दल अभिनंदनाचा ठराव मांडण्यात आला. हा ठराव सौ. वंदना भिलारे यांनी मांडला त्यास संजय शेलार यांनी अनुमोदन दिले. विविध विभागांच्या आढाव्यात बांधकाम विभागाने प्राप्त, खर्च व शिल्लक अनुदानासह पूर्ण व अपूर्ण कामांची माहिती सादर केली. ग्रामीण पाणी पुरवठा विभागाने ‘जल जीवन मिशन’ अंतर्गत सुरू असलेल्या कामांची गावनिहाय माहिती दिली. शिक्षण विभागाने विविध योजनांची माहिती सादर केली असून रिक्त पदे भरण्यासाठी आवश्यक पत्रव्यवहार करण्यावर भर देण्यात आला. आरोग्य विभागाच्या उत्कृष्ट कामगिरीबद्दल अभिनंदनाचा ठराव मंजूर करण्यात आला. पशुसंवर्धन विभागाने राबविलेल्या योजनांबाबत पदाधिकाऱ्यांनी प्रश्न विचारून शंकांचे निरसन केले. सर्व विभागांनी योजना व कामे वेळेत पूर्ण करण्यासाठी दक्षता घेण्याचे निर्देश देण्यात आले. यावेळी सभापती शकुंतला चोरमले, उपसभापती संजय मोरे तसेच सदस्यांनी जनतेच्या हिताच्या प्रश्नांना प्राधान्य देऊन कामकाज करण्याच्या सूचना दिल्या. सभेत सर्व अधिकारी व कर्मचाऱ्यांनी पदाधिकाऱ्यांच्या समन्वयाने जनतेची कामे वेळेत पूर्ण करण्यावर भर देण्यात आला. गटविकास अधिकारी विजय विभुते यांनी पदाधिकाऱ्यांच्या मार्गदर्शनाखाली कामकाज प्रभावीपणे राबविण्याची ग्वाही दिली.
