भारत आणि पाकिस्तानमध्ये तणाग्रस्त परिस्थिती निर्माण झाल्यामुळे अनेक नियोजित कार्यक्रम पुढे, तर काही कार्यक्रम रद्द करण्यात आले होते. ९ मे रोजी थिएटरमध्ये प्रदर्शित होणाऱ्या राजकुमार राव आणि वामिका गब्बी स्टारर ‘भूल चुक माफ’ या चित्रपटाच्या निर्मात्यांनी चित्रपट रिलीजच्या एक दिवस अगोदर हा चित्रपट थिएटरमध्ये रिलीज न करण्याचा निर्णय घेतला. त्यानुसार हा चित्रपट १६ मे या दिवशी अॅमेझॅान प्राईम या ओटीटी माध्यमावर रिलीज करण्यात येणार आहे. अशातच भारतातील सर्वात मोठी मल्टिप्लेक्स कंपनी पीव्हीआर आयनॅाक्सने चित्रपटाच्या निर्मिती संस्था मॅडॉक फिल्म्सविरुद्ध नाराजी व्यक्त करत खटला दाखल केला आहे भूल चुक माफच्या प्रोडक्शन हाऊसविरुद्ध पीव्हीआर आयनॉक्सने ६० कोटी रुपयांच्या नुकसानीसाठी कायदेशीर कारवाई करण्याचा निर्णय घेतला आहे. बॉलीवूड हंगामाने दिलेल्या वृत्तानुसार, “पीव्हीआरने मुंबई उच्च न्यायालयात खटला दाखल केला आहे. सर्व करारांवर स्वाक्षरी झाल्यानंतर अचानक मॅडॉकने माघार घेतली. त्यामुळे हा ‘कराराचा भंग’ करण्याचा खटला आहे.” असे यामध्ये नमूद करण्यात आले आहे. परंतु, पीव्हीआरने युक्तीवाद केला आहे की निर्मात्यांना वाटत असेल की पहगाम हल्ल्यामुळे प्रेक्षकांच्या संख्येवर परिणाम होईल. तर ते चित्रपट काही आठवडे किंवा एक महिना उशिरा थिएटरमध्ये प्रदर्शित करू शकले असते. थेट ओटीटीमध्ये गेल्याने नियमांचा भंग झाल्याचे सांगितले जात आहे. ८ दिवसांपूर्वी, २ मे रोजी, मॅडॉक फिल्म्सचे दिनेश विजान आणि पीव्हीआर आयनॉक्सचे अजय बिजली यांनी वेव्हज २०२५ मध्ये एकत्र स्टेज शेअर केला होता. पीव्हीआर ही स्त्री २ (२०२४) च्या वितरकांपैकी एक आणि स्काय फोर्स (२०२५) ची एकमेव वितरक कंपनी होती, दोन्ही चित्रपटांची निर्मिती मॅडॉकने केली आहे.
