M. K. Stalin : द्रमुकचे प्रमुख एम.के.स्टॅलिन (M. K. Stalin) यांनी शनिवारी पक्षाचे कार्यकर्ते, समर्थकांचा उत्साह वाढवण्यासाठी आक्रमक, जोशपूर्ण शैलीत भूमिका मांडली. राजकीय कमबॅक करण्यात द्रमुक स्पेशालिस्ट आहे, असे म्हणत त्यांनी राजकीय प्रतिस्पर्ध्यांना आणि विशेषत: तमिळनाडूचे मुख्यमंत्री विजय यांना इशारा दिला.

तमिळनाडूत काही महिन्यांपूर्वी विधानसभा निवडणूक झाली. त्यामध्ये विजय यांच्या टीव्हीकेची सरशी झाल्याने द्रमुकला सत्ता गमवावी लागली. त्या पराभवाची मरगळ झटकून जनतेपर्यंत पोहचण्यासाठी स्टॅलिन (M. K. Stalin) पक्षाला सज्ज करू पाहत आहेत.

त्या उद्देशातून त्यांनी पक्षाच्या कार्यकारिणी बैठकीत बोलताना राजकीय कमबॅक करण्याचा विश्‍वास व्यक्त केला. त्यांनी भाषणात पक्षाच्या रचनेत सुधारणा घडवण्याच्या योजनेवर भर दिला.

राजकीय जय-पराजयाच्या पलिकडे द्रमुकचा पाया विस्तारला आहे. विरोधी बाकांवर असतानाही आपला पक्ष जनतेसाठी कार्यरत राहण्यासाठी ओळखला जातो, असे त्यांनी म्हटले. विजय यांच्यावरही त्यांनी जोरदार निशाणा साधला. विधानसभेला (M. K. Stalin) चित्रपटाचा सेट समजून विजय डायलॉग मारत असतात. त्यांचे सरकार जनतेसाठी कुठलेही कार्य न करता सत्तेवर आले. ते सरकार आम्ही आणलेल्या सर्व प्रकल्पांची नावे बदलण्यात व्यस्त आहे, असे टीकास्त्र स्टॅलिन यांनी सोडले.