Kharif Crops : देशात यंदा मान्सूनच्या पावसाने चिंता वाढवली आहे. जून ते सप्टेंबर या चार महिन्यांत दीर्घकालीन सरासरीपेक्षा १२.६ टक्के कमी पाऊस झाला. त्यातच अल निनोचा धोका कायम असल्याने खरीप पिकांच्या उत्पादनावर परिणाम होण्याची शक्यता आहे.

डन अँड ब्रॅडस्ट्रीटच्या अहवालानुसार, ५ ऑक्टोबरपर्यंत खरीप पिकांच्या पेरणीचे क्षेत्र गेल्या वर्षीपेक्षा १.१ टक्क्यांनी कमी झाले. एकूण अन्नधान्य पिकांच्या क्षेत्रातही १.६ टक्के घट झाली आहे.

धानाची पेरणी ३.५ टक्क्यांनी कमी –

देशातील प्रमुख अन्नधान्य असलेल्या धानाच्या पेरणी क्षेत्रात ३.५ टक्के घट झाली आहे. मात्र, सरकारकडे तांदळाचा पुरेसा साठा असल्याने उत्पादनात थोडी घट झाली तरी त्याचा ग्राहकांवर तातडीने मोठा परिणाम होण्याची शक्यता कमी आहे.

मक्याचे उत्पादन महत्त्वाचे –

मक्याच्या पेरणी क्षेत्रात २.९ टक्के घट झाली आहे. मका पोल्ट्री, पशुखाद्य, स्टार्च, प्रक्रिया उद्योग आणि इथेनॉल निर्मितीसाठी मोठ्या प्रमाणावर वापरला जातो. त्यामुळे उत्पादन कमी झाल्यास त्याचा थेट परिणाम या उद्योगांच्या खर्चावर होऊ शकतो.
दाळींची कमतरता भरून काढण्यासाठी आयातीचा पर्याय आहे. मात्र, त्यासाठी जागतिक बाजारातील दर आणि रुपयाच्या विनिमय दरावर अवलंबून राहावे लागेल.

मध्य प्रदेश, राजस्थान, तेलंगणा, महाराष्ट्र आणि आंध्र प्रदेश या प्रमुख उत्पादक राज्यांतील पिकांच्या स्थितीवर विशेष लक्ष आहे. या राज्यांमध्ये उत्पादन एकाच वेळी घटल्यास पुरवठ्यावर दबाव वाढू शकतो. त्यामुळे मका आणि दाळींच्या दरवाढीचा धोका वाढून पुढील काळात खाद्य महागाईवर परिणाम होण्याची शक्यता आहे.