पटना – बिहारच्या मुंगेर जिल्ह्यातून एक धक्कादायक घटना समोर आली आहे. एका 60 वर्षीय व्यक्तीच्या प्रेमकथेला नाट्यमय वळण मिळाले आहे. होळीच्या दिवशी धरहरा पोलीस ठाण्याच्या हद्दीतील दशरथपूर गावात एका वृद्धाने मंदिरात प्रेमविवाह केला, मात्र लग्नानंतर घडलेल्या प्रकाराने संपूर्ण गावात खळबळ उडाली आहे. नववधूला घेऊन तो घरी पोहोचताच त्याच्या कुटुंबीयांनी त्याला घरात जाण्यापासून रोखले. विशेषत: मुलाची प्रतिक्रिया इतकी तीव्र होती की वडिलांना ते सहन झाले नाही आणि रागाच्या भरात त्यांनी आत्महत्या करण्याचा प्रयत्न केला.

या घटनेनंतर गावात वेगवेगळी चर्चा होऊ लागली. काहींनी याला समाजाची कठोर विचारसरणी म्हटले, तर काहींनी मुलाच्या रागाचे समर्थन केले. पण प्रश्न असा आहे की वय जास्त झाल्यावर लग्न करणे चुकीचे आहे का? वृद्धांना आनंदी राहण्याचा अधिकार नाही का?

होळीला लग्न, नंतर अचानक गायब –

60 वर्षीय मुशारू यादव यांचा 15 मार्च रोजी गावातील एका महिलेशी मंदिरात विवाह झाला. लग्नानंतर दोघेही 16 मार्चपर्यंत अचानक गायब झाले. 17 मार्च रोजी मुशारू आपल्या नववधूला घेऊन घरी पोहोचले तेव्हा त्यांचा मुलगा सूरज चिडला आणि त्याने वडिलांना घरात येऊ दिले नाही.

वडिलांनी रागाच्या भरात विष प्यायले –

मुलाच्या या वागण्याने दुखावलेल्या मुशारू यादव यांनी संतापून कीटकनाशक प्यायले. हे पाहून गावात एकच खळबळ उडाली. ग्रामस्थ व त्यांच्या मुलाने त्यांना प्राथमिक आरोग्य केंद्रात उपचारासाठी दाखल केले. त्यांची प्रकृती गंभीर झाल्याने डॉक्टरांनी त्यांना मुंगेर सदर रुग्णालयात दाखल केले, तेथे त्यांच्यावर उपचार सुरू आहेत.

पहिल्या पत्नीचे 15 वर्षांपूर्वी निधन –

मुशारू यादव यांनी शेतात मजूर म्हणून काम करणाऱ्या महिलेसोबत प्रेमविवाह केल्याचे सांगितले. मात्र त्यांच्या मुलाने हे नाते मान्य केले नाही, यावरून दोघांमध्ये भांडण झाले. भांडण झाल्यावर त्याची पत्नी तिच्या घरी गेली आणि रागाच्या भरात त्यांनी विष प्राशन केले. मुशारू यांनी असेही सांगितले की, त्यांच्या पहिल्या पत्नीचे 15 वर्षांपूर्वी निधन झाले असून त्यांना तीन मुले आणि एक मुलगी आहे. त्यांच्या दुसऱ्या पत्नीला एक मुलगा आणि एक मुलगी आहे आणि तिचा पहिला नवरा मजूर म्हणून काम करतो.

मुलगा काय म्हणाला?

मुशारू यादव यांचा मोठा मुलगा नीरज कुमारने सांगितले की, जेव्हा त्यांच्या वडिलांनी विष प्राशन केले तेव्हा ते घरी नव्हते. लहान भाऊ सूरजने वडिलांना घरात येऊ दिले नाही, त्यामुळे संतापून त्यांनी हे पाऊल उचलले. नीरज म्हणाला, “आम्ही इथे हॉस्पिटलमध्ये आहोत आणि त्यांच्यावर उपचार करत आहोत. जेव्हा भांडण झालं तेव्हा ती बाईही निघून गेली. आता पप्पा नेमकं काय झालं याबद्दल काहीच सांगत नाहीत.”

कौटुंबिक वाद प्रकरण –

धारहरा पोलिस स्टेशनचे प्रभारी म्हणाले की, वडिलांच्या लग्नाचा राग आल्याने मुलाने त्यांना घरात येऊ दिले नाही, त्यामुळे हा संपूर्ण वाद झाला. मात्र, याप्रकरणी पोलिसांत कोणतीही रितसर तक्रार दाखल झालेली नाही. पोलीस या संपूर्ण प्रकरणावर लक्ष ठेवून आहेत.