फिफा विश्वचषक 2022 संपला आहे. या स्पर्धेचा अंतिम सामना अर्जेंटिना आणि फ्रान्स यांच्यात झाला. अर्जेंटिनाची कमान लिओनेल मेस्सीच्या हाती होती. 35 वर्षीय मेस्सीने विश्वचषक खेळताना अर्जेंटिनाला चॅम्पियन बनवले. सध्या मेस्सीची गणना जगातील महान फुटबॉलपटूंमध्ये केली जाते, पण एक वेळ अशी आली होती जेव्हा स्वतः मेस्सीला वाटले नव्हते की तो फुटबॉल जगतात एवढे मोठे नाव बनेल.

1987 मध्ये मेस्सीचा जन्म एका मध्यमवर्गीय कुटुंबात झाला. त्याचे वडील एका कारखान्यात काम करत असत आणि आई साफसफाईचे काम करायची. मेस्सीचे वडील एका फुटबॉल क्लबमध्ये प्रशिक्षक होते. त्यामुळे फुटबॉल हे मेस्सीच्या रक्तातच होते. वयाच्या अवघ्या पाचव्या वर्षी मेस्सीने एका फुटबॉल क्लबमध्ये प्रवेश घेतला. येथे त्याने खेळाच्या मूलभूत गोष्टी शिकल्या. वयाच्या आठव्या वर्षी मेस्सी नेवेल ओल्ड बॉईज क्लबमध्ये सामील झाला.

गंभीर आजारावर मात करून मेस्सी झाला चॅम्पियन –
मेस्सी फुटबाॅलचा सराव करत असतानाच त्याला ग्रोथ हार्मोनची कमतरता असल्याचे निदान झाले. या आजाराने ग्रस्त मुलांचा शारीरिक विकास थांबतो. मेस्सीच्या आजाराची माहिती मिळताच त्याचे कुटुंबीय काळजीत पडले. दरम्यान, बार्सिलोनाने युवा फुटबॉलपटूंसाठी टॅलेंट हंट प्रोग्राम सुरू केला आणि त्यात मेस्सीची निवड झाली. यानंतर बार्सिलोनाने मेस्सीच्या उपचाराचा संपूर्ण खर्च उचलला आणि त्याला या आजाराचा त्रास झाला नाही. मेस्सीने व्यावसायिक फुटबॉलमध्ये पाऊल ठेवले होते, परंतु त्याला युरोपमध्ये स्थायिक व्हायला जवळपास एक वर्ष लागले. तो अर्जेंटिनाच्या ब संघाचा भाग बनला आणि जवळपास प्रत्येक सामन्यात त्याने एक गोल केला. मेस्सी 14 वर्षे या संघासोबत राहिला.

मेस्सीने वयाच्या १७ व्या वर्षी बार्सिलोनाकडून पदार्पण केले. त्याने 2004 मध्ये पदार्पण केले आणि क्लबसाठी खेळणारा तो तिसरा सर्वात तरुण खेळाडू ठरला. मे 2005 मध्ये, मेस्सीने बार्सिलोनाच्या मुख्य संघासाठी पहिला गोल केला. जूनमध्ये त्याने वरिष्ठ खेळाडू म्हणून बार्सिलोनाशी करार केला आणि तेव्हापासून त्याने मागे वळून पाहिले नाही.

मेस्सीने आतापर्यंत सात वेळा बॅलोन डी’ओर, सहा वेळा युरोपियन गोल्डन शूज, बार्सिलोनासाठी ३५ जेतेपद पटकावले आहेत. त्याने ला लीगामध्ये 474 गोल केले आहेत. बार्सिलोनासाठी त्याने 672 गोल केले आहेत.

मेस्सी पहिल्यांदा 2006 च्या विश्वचषकात दिसला होता. तेव्हापासून त्याने सर्वाधिक 26 विश्वचषक सामने खेळले आहेत. यादरम्यान त्याने अर्जेंटिनासाठी सर्वाधिक 13 गोल केले आहेत. मेस्सीने वयाच्या 22 व्या वर्षी पहिले बॅलन डी’ओर जेतेपद पटकावले. 2021 मध्ये तो बार्सिलोनापासून वेगळा झाला.

2008 मध्ये, मेस्सीने बीजिंग ऑलिम्पिकमध्ये अर्जेंटिनाला सुवर्णपदक मिळवून दिले. मात्र 2010 च्या विश्वचषकात त्याला एकही गोल करता आला नाही आणि त्याच्या संघालाही पराभवाचा सामना करावा लागला. 2014 मध्ये त्याचा संघ जर्मनीकडून फायनलमध्ये हरला आणि मेस्सीला अश्रू अनावर झाले. मेस्सीची शेवटची इच्छा विश्वचषक जिंकण्याची होती, जी त्याने 2022 मध्ये पूर्ण केली.