Lifestyle: शॅम्पू केल्यानंतर दुसऱ्याच दिवशी केस ऑयली, चिकट आणि मळलेले दिसू लागतात का? असं होत असेल, तर यामागे फक्त हार्मोन्स नाहीत, तर आपल्या काही रोजच्या सवयी आणि चुकाही कारणीभूत असू शकतात. या लेखात जाणून घेऊया की केस लवकर तेलकट का होतात आणि त्यापासून कसं बचाव करता येईल. केस लवकर तेलकट का होतात? आपल्या टाळूवर (स्कॅल्प) सेबेशियस ग्रंथी असतात. या ग्रंथी सीबम नावाचं नैसर्गिक तेल तयार करतात. हे तेल केसांना ओलावा देतं, कोरडेपणा, खाज आणि फ्रिझीपणा टाळतं. पण काही लोकांमध्ये सीबमचं उत्पादन जास्त होतं. त्यामुळे केस पटकन तेलकट दिसतात. यामागे हार्मोनल बदल किंवा चुकीचे हेअर केअर प्रॉडक्ट्स कारणीभूत असू शकतात. जास्त सीबममुळे टाळूवर मळ साचतो, पोअर्स ब्लॉक होतात आणि त्यामुळे डँड्रफ, खाज, केस गळणे अशा समस्या वाढू शकतात. या चुका तुमचे केस लवकर ऑयली बनवतात उशीचं कव्हर वेळेवर न बदलणं अनेक जण उशीचं कव्हर अनेक दिवस बदलत नाहीत. त्यामुळे त्यावर तेल, घाम आणि जंतू साचतात. हे सगळं पुन्हा केसांना लागतं आणि केस पटकन ऑयली होतात. शक्यतो सिल्क किंवा सॅटिनचं कव्हर वापरा. यामुळे केसांवर घर्षण कमी होतं आणि तुटणंही कमी होतं. Greasy Hair कंडिशनर चुकीच्या पद्धतीने लावणं कंडिशनर केस मऊ ठेवतो, पण तो फक्त केसांच्या लांबीवर लावावा. टाळूवर (स्कॅल्पवर) कंडिशनर लावल्यास केस पटकन तेलकट होतात. तसंच, खूप जड किंवा जास्त प्रमाणात कंडिशनर वापरणंही टाळा. आपल्या केसांच्या प्रकारानुसारच शॅम्पू आणि कंडिशनर निवडा. हेअर ब्रश स्वच्छ न ठेवणं घाणेरडा कंगवा किंवा ब्रश वापरल्यामुळे केस पटकन मळतात. आठवड्यातून किमान २ वेळा कंगवा आणि ब्रश गरम पाण्याने स्वच्छ करा. नाहीतर केस ऑयली होण्यासोबत इतर समस्या देखील वाढू शकतात. केसांना सतत हात लावणं केसांवर वारंवार हात फिरवण्याची सवय असेल, तर ती बदला. हातांवरची घाण, क्रीम, मॉइश्चरायझर केसांवर जातं आणि त्यामुळे केस लवकर चिकट होतात. स्कॅल्प नीट साफ न करणं बरेच लोक शॅम्पू करताना केसांच्या टोकांवर जास्त लक्ष देतात, पण स्कॅल्प नीट साफ करत नाहीत. स्कॅल्प स्वच्छ न झाल्याने मळ साचतो आणि केस लवकर ऑयली दिसतात. शॅम्पू करताना हलक्या हाताने स्कॅल्प मसाज करा आणि केसांच्या टोकांना जास्त रगडू नका. केस लवकर तेलकट होण्यामागे केवळ शरीरातील बदलच नाहीत, तर आपल्या दैनंदिन सवयीही तितक्याच जबाबदार असतात. थोडेसे बदल केल्यास केस जास्त काळ स्वच्छ, हलके आणि फ्रेश राहू शकतात.
