बारामती : बारामती शहराच्या सर्वांगीण आणि समतोल विकासासाठी नगरपालिकेतील सर्व 41 नगरसेवकांनी राजकारणापलीकडे जाऊन एकत्र काम करणार असल्याची माहिती नवनिर्वाचित नगराध्यक्ष सचिन सातव यांनी दिली. शहराचा विकास हा केवळ एखाद्या गटाचा किंवा भागापुरता मर्यादित न राहता समाजातील शेवटच्या घटकापर्यंत पोहोचला पाहिजे, या उद्देशाने सर्व नगरसेवक एकदिलाने काम करतील, असा विश्वास त्यांनी व्यक्त केला. बारामती व्यापारी महासंघ आणि दि बारामती मर्चेंट्स असोसिएशन यांच्या संयुक्त विद्यमाने बारामती नगरपरिषदेचे नवनिर्वाचित नगराध्यक्ष व नगरसेवकांचा जाहीर सत्कार समारंभ आयोजित केला होता. यावेळी ते बोलत होते. कार्यक्रमाला व्यापारी संघटनांचे पदाधिकारी, शहरातील सर्व नगरसेवक, विविध संस्थांचे प्रतिनिधी आणि नागरिक मोठ्या संख्येने उपस्थित होते. सातव म्हणाले की, आगामी काळात बारामती शहरासमोरील पाणी, रस्ते, स्वच्छता, वाहतूक, आरोग्य, शिक्षण आदी मूलभूत प्रश्न तसेच सर्वसामान्य नागरिकांच्या दैनंदिन अडचणी सोडवण्यासाठी सर्व नगरसेवक एकजुटीने प्रयत्न करतील. कोणतेही जात-पात, गट-तट किंवा वैयक्तिक राजकारण न करता केवळ शहर व लोकहिताचा विचार करून निर्णय घेतले जातील. पारदर्शक, समावेशक, लोकाभिमुख कारभार देण्यावर विशेष भर दिला जाईल, असेही त्यांनी स्पष्ट केले. यावेळी संजय दुधाळ, सुभाष सोमानी, मर्चंट असोसिएशनचे अध्यक्ष संभाजी किरवे व्यापारी महासंघाचे अध्यक्ष सुशील सोमानी आदींनी मनोगत व्यक्त केले. यावेळी फोनद्वारे व्यापारी महासंघाचे माजी अध्यक्ष नरेंद्र गुजराती यांनी शुभेच्छा दिल्या. यावेळी प्रशांत चांदगुडे, महेश ओसवाल, प्रवीण आहुजा, अतुल गांधी, पारस खटावकर, पंडीत भागवत, शाम तिवाटणे, सुरेंद्र मुथा, फकरुद्दीन कायमखानी, किशोर सराफ तसेच इतर व्यापारी उपस्थित होते. राजकारण न करता प्रश्न मार्गी लावू सातव म्हणाले की, मागील काही कालावधीत शहरातील काही भागांमध्ये अपेक्षित विकास झाला नसेल, तरी पुढील पाच वर्षांच्या कालावधीत तो विकास भरून काढण्यासाठी नियोजनबद्ध पद्धतीने काम केले जाईल. सर्व भागांना समान न्याय देत विकासाची गती वाढवण्याचा प्रयत्न केला जाईल. राजकारण न करता केवळ हिताचे प्रश्न मार्गी लावण्यावर नगरपरिषद लक्ष केंद्रित करणार आहे. यावेळी नगराध्यक्षांनी उपमुख्यमंत्री अजित पवार यांच्या नेतृत्वाखाली आणि त्यांनी दाखवलेल्या विकासाच्या मार्गावर बारामती शहराला पुढे नेण्याचा निर्धार व्यक्त केला. खासदार सुनेत्रा पवार यांच्या मार्गदर्शनाखाली बारामतीचा विकास अधिक वेगाने, प्रभावीपणे होईल, असा विश्वासही त्यांनी व्यक्त केला.
