प्रभात वृत्तसेवा शिक्रापूर – शिक्रापूर (ता. शिरुर) येथील चाकणरोड, वडजाई नगर परिसरात वारंवार बिबट्याचे दर्शन होऊन काही जनावरांवर बिबट्याचे हल्ले केलेले असताना नुकतेच वनविभागाने लावलेल्या पिंजऱ्यात एक नर जातीचा बिबट्या जेरबंद करण्यात वनविभागाला यश आले आहे. शिक्रापूर येथील चाकणरोड, वडजाई नगर परिसरात वारंवार बिबट्याचे दर्शन होत असल्याने शिरुर वनविभागाच्या वतीने चाकण रोड येथील वडजाई नगर जवळ श्रीधर शिंदे यांच्या गोठयामागे शेतात पिंजरा लावण्यात आला होता. रविवारी सकाळच्या सुमारास प्रतिक शिंदे हे शेतात गेले असतना त्यांना बिबट्याच्या पिंजऱ्याचा दरवाजा बंद असल्याचे दिसल्याने त्यांनी पाहणी केली. पिंजऱ्यात बिबट्या अडकल्याचे निदर्शनास आले. याबाबतची माहिती शिरुर वनपरिक्षेत्र अधिकारी निळकंठ गव्हाणे यांना मिळताच वनपरिमंडळ अधिकारी गौरी हिंगणे, नियतक्षेत्र वनअधिकारी प्रमोद पाटील, वन्यजीव बचाव पथकाचे शेरखान शेख, गणेश टिळेकर, अमोल कुसाळकर, परमेश्वर दहीरे यांनी घटनास्थळी धाव घेतली. श्रीधर शिंदे, प्रतिक शिंदे, दत्ता चव्हाण यांसह आदींच्या उपस्थितीत बिबट्याला ताब्यात घेतले. यावेळी पिंजऱ्यात जेरबंद झालेला बिबट्या अंदाजे पाच वर्षे वयाचा आणि नर प्रवर्गातील असून बिबट्याची रवानगी माणिकडोह येथील बिबट निवारा केंद्रात केल्याचे वनपरिक्षेत्र अधिकारी गव्हाणे यांनी सांगितले.
