Leopard Accident – धानोरे (ता. शिरूर) येथील बेळ जेजुरी महामार्गावर अज्ञात वाहनाने धडक दिल्याने एका बिबट्याच्या बछड्याचा मृत्यू झाल्याची घटना घडली आहे. या घटनेची माहिती मिळताच वनविभागाच्या पथकाने तातडीने घटनास्थळी धाव घेत बछड्याचा पंचनामा केला आणि त्यानंतर शवविच्छेदन करून दहन विधी पार पाडला. धानोरे येथील डॉ. संजय देवधरे यांच्या शेतालगत असलेल्या महामार्गावर बिबट्याचा बछडा मृत अवस्थेत असल्याची माहिती वनपरिक्षेत्र अधिकारी निळकंठ गव्हाणे व वनपरीमंडळ अधिकारी गौरी हिंगणे यांना मिळाली होती. त्यानंतर नियतक्षेत्र अधिकारी प्रमोद पाटील, वन्यजीव बचाव पथकाचे गणेश टिळेकर, शेरखान शेख, अमोल कुसाळकर, राहुल गायकवाड आणि शुभांगी टिळेकर यांनी घटनास्थळी भेट दिली. माजी उपसरपंच विजय ढमढेरे, शिरीष ढमढेरे, रवींद्र जेधे, तात्यासो ढमढेरे व रमेश शेलार यांच्या उपस्थितीत मृत बछड्याला ताब्यात घेण्यात आले. तपासणी दरम्यान, मृत झालेला बिबट हा अंदाजे एक वर्ष वयाचा आणि मादी प्रवर्गातील असल्याचे निष्पन्न झाले. पशुवैद्यकीय अधिकारी डॉ. गोविंद राठोड यांनी बछड्याचे शवविच्छेदन केले, त्यानंतर नियमानुसार त्याचे दहन करण्यात आले. महामार्गावर वन्यजीवांच्या अपघातांचे प्रमाण वाढत असल्याने परिसरातून चिंता व्यक्त केली जात आहे.
