Yashasvi Jaiswal 2 KG weight loss in 2 Day : भारतीय क्रिकेट संघाचा धडाकेबाज सलामीवीर यशस्वी जैस्वालच्या प्रकृतीबाबत एक चिंताजनक अपडेट समोर आली आहे. गेल्या दोन दिवसांत यशस्वीचे सुमारे २ किलो वजन कमी झाले असून डॉक्टरांनी त्याला ७ ते १० दिवस पूर्ण विश्रांती घेण्याचा सल्ला दिला आहे. सय्यद मुश्ताक अली ट्रॉफी दरम्यान हरियाणाविरुद्धच्या सामन्यात त्याची प्रकृती अचानक बिघडली होती. मैदानावरच बिघडली तब्येत – हरियाणाविरुद्धच्या सामन्यादरम्यान यशस्वीला प्रचंड अस्वस्थ वाटू लागले, त्यानंतर त्याला तातडीने रुग्णालयात दाखल करण्यात आले. सुरुवातीला त्याच्या पोटात सूज आल्याचे सांगण्यात आले होते, मात्र सखोल तपासणीनंतर आजाराचे खरे कारण समोर आले. सीटी स्कॅन आणि अल्ट्रासाऊंड अहवालांनुसार, यशस्वीला ‘गॅस्ट्रोएन्टेरिटिस’ झाल्याचे निदान झाले आहे. हा त्रास सामान्यतः दूषित अन्नामुळे (फूड पॉइझनिंग) होतो, ज्यामध्ये पोटदुखी, अशक्तपणा आणि वेगाने वजन कमी होणे यांसारखी लक्षणे दिसतात. मुंबईत परतला यशस्वी – रुग्णालयात उपचार घेतल्यानंतर यशस्वीच्या प्रकृतीत आता सुधारणा होत आहे. त्याला रुग्णालयातून डिस्चार्ज देण्यात आला असून तो मुंबईला परतला आहे. ‘टाइम्स ऑफ इंडिया’शी बोलताना एका सूत्राने सांगितले की, “पुण्यातील हॉटेलमध्ये काहीतरी खाल्ल्यामुळे त्याला ही विषबाधा झाली असावी. सध्या त्याला १० दिवस विश्रांती घेण्यास सांगण्यात आले आहे, त्यामुळे तो क्रिकेटपासून काही काळ दूर राहील.” हेही वाचा – Stokes Archer Fight : लाइव्ह सामन्यात स्टोक्स-ऑर्चरमध्ये जुंपली! जोरदार वादावादीचा VIDEO व्हायरल विजय हजारे ट्रॉफीला मुकण्याची शक्यता – प्रकृती पूर्णपणे स्थिर होण्यासाठी किमान एक आठवडा लागणार असल्याने, यशस्वी ‘विजय हजारे ट्रॉफी’चे सुरुवातीचे काही सामने खेळू शकणार नाही. बीसीसीआय देखील त्याच्या प्रकृतीवर सातत्याने लक्ष ठेवून आहे. पुढच्या महिन्यात न्यूझीलंडविरुद्ध होणाऱ्या व्हाईट बॉल मालिकेसाठी तो भारतीय वनडे संघाचा महत्त्वाचा भाग असणार आहे. हेही वाचा – IND vs SA : ‘तीन पोती गहू विकून आलो होतो…’, सामना रद्द झाल्यानंतर संतापलेल्या चाहत्याचा VIDEO व्हायरल नुकत्याच दक्षिण आफ्रिकेविरुद्ध झालेल्या तिसऱ्या वनडे सामन्यात यशस्वीने १२१ चेंडूत ११६ धावांची झंझावाती शतकी खेळी केली होती. त्याच्या या फॉर्ममुळे टीम मॅनेजमेंटला आशा आहे की, तो लवकरच तंदुरुस्त होऊन न्यूझीलंड दौऱ्यावर पुन्हा एकदा आपली चमक दाखवेल.
