पुणे : अमेरिकेतील एपस्टीन प्रकरणातील गोपनीय फाइल्स १९ डिसेंबर रोजी उघड होणार असून, त्यातून जगाला हादरवणारी माहिती समोर येईल, असा स्फोटक दावा काँग्रेसचे ज्येष्ठ नेते आणि माजी मुख्यमंत्री पृथ्वीराज चव्हाण यांनी केला आहे. Epstein Files या फाइल्समुळे केवळ अमेरिकाच नव्हे, तर भारताच्या राजकारणातही मोठी उलथापालथ होईल आणि देशाचा पंतप्रधान बदलण्याची शक्यता आहे, असा तर्क चव्हाण यांनी मांडला आहे. विशेष म्हणजे, नवीन पंतप्रधान काँग्रेस किंवा बारामतीचा नसून, भाजपचा आणि नागपूरशी संबंधित असेल, असंही त्यांनी यावेळी म्हटलं आहे, त्यांच्या या दाव्याने राजकीय वर्तुळात मोठी खळबळ उडाली आहे. मुलींच्या मदतीने नेत्यांना हनी ट्रॅपमध्ये अडकवले पृथ्वीराज चव्हाण यांनी नुकत्याच एका पत्रकार परिषदेत या प्रकरणाची सविस्तर माहिती दिली आहे. ते म्हणाले, एपस्टीन नावाच्या व्यक्तीने १९९५ पासून अल्पवयीन मुलींच्या मदतीने जगातील मोठमोठ्या राजकारण्यांना, उद्योगपतींना आणि प्रभावशाली व्यक्तींना हनी ट्रॅपमध्ये अडकवले. त्याने अनेकांना अल्पवयीन मुली पुरवल्या आणि त्याचा वापर करून ब्लॅकमेलिंग केले. या प्रकरणात १०० हून अधिक मुलींनी तक्रारी केल्या आहेत. न्यूयॉर्कच्या तुरुंगात हत्या की ‘आत्महत्या? एपस्टीनला २००८ मध्ये १३ महिन्यांची शिक्षा झाली, पण २०१९ मध्ये पुन्हा अटक झाल्यानंतर न्यूयॉर्कच्या उच्च सुरक्षा तुरुंगात त्याची ‘आत्महत्या’ झाल्याची बातमी आली. मात्र, हा आत्महत्या नव्हे, तर हत्या असण्याची शक्यता आहे. तुरुंगात दोर कुठून आला? गळा दाबून मारण्याचे पुरावे पोस्टमॉर्टममध्ये दिसले,” असे चव्हाण यांनी सांगितले. Epstein Files फाईलमध्ये ट्रम्प अन् बिल गेट्स यांची नावे या फाइल्समध्ये डोनाल्ड ट्रम्प, माजी राष्ट्राध्यक्ष बिल क्लिंटन, बिल गेट्स आणि ब्रिटनचे प्रिन्स अँड्र्यू यांसारख्या मोठ्या नावांचा उल्लेख असून बिल गेट्स यांनी हे मान्य केले आहे, तर प्रिन्स अँड्र्यू यांनी कोर्टाबाहेर सेटलमेंट केली. आता अमेरिकेच्या संसदेने १९ नोव्हेंबर रोजी एक कायदा पारित करून या फाइल्स एका महिन्यात उघड करण्याचे आदेश दिले आहेत, १९ डिसेंबरला ही फाइल्स खुल्या होताच जगाच्या राजकारणात मोठी उलथापालथ होईल, असंही चव्हाण यांनी म्हटले आहे. अमेरिकेत २०२६ मध्ये निवडणुका असल्याने ट्रम्प यांच्या खासदारांनी या फाइल्स उघडण्यासाठी दबाव टाकला, जेणेकरून दोषींना शिक्षा होईल आणि निवडणुकीत फटका बसणार नाही, असा मुद्दाही चव्हाण यांनी यावेळी उपस्थित केला. भारतातील काही आजी-माजी खासदारांची नावे पुढे बोलताना चव्हाण म्हणाले, या फाइल्समध्ये भारतातील काही आजी-माजी खासदारांची नावे असल्याची चर्चा अमेरिकेतील सोशल मीडियावर सुरू आहे. त्यामुळे भारताच्या राजकारणावरही परिणाम होईल. मी यापूर्वीही सांगितले आहे की, पंतप्रधान बदलले तर ते नागपूरशी संबंधित व्यक्ती असेल. मोदींचे परराष्ट्र धोरण पूर्णपणे अपयशी ठरले आहे. मी जे बोलतो ते अमेरिकेच्या संसदेच्या वेबसाइटवर उपलब्ध आहे. सोशल मीडियावरील चर्चा आणि उपलब्ध माहितीच्या आधारे हा तर्क मी मांडतो आहे, असं पृथ्वीराज चव्हाण यांनी म्हटले आहे. दरम्यान, भाजपने चव्हाण यांच्या वक्तव्याला ‘राजकीय स्टंट’ म्हणून हाणून पाडले आहे. मुख्यमंत्री देवेंद्र फडणवीस यांनीही चव्हाण यांच्या भविष्यवाणीची खिल्ली उडवली आहे. तरीही, १९ डिसेंबरची तारीख जवळ येत असल्याने राजकीय वर्तुळात उत्सुकता शिगेला पोहोचली आहे. एपस्टीन प्रकरण खरेच भारताच्या पंतप्रधानपदावर परिणाम करेल का? हे पाहणे औत्सुक्याचे ठरणार आहे.
