चाकण : येऊ घातलेल्या संभाव्य जिल्हा परिषद व पंचायत समिती निवडणुकांच्या पार्श्वभूमीवर खेड तालुक्याचे राजकीय वातावरण चांगलेच तापले आहे. अधिकृत उमेदवारी मिळवण्यासाठी पक्षांतर, स्वगृही परतणे, नव्या पक्षात प्रवेश असे प्रकार जोमात सुरू असून, या ‘परतणी’ला येत्या काळात अधिक भव्य स्वरूप येण्याची चिन्हे दिसत आहेत. यात घराणेशाहीही मागे नाही, हे प्रकर्षाने जाणवत आहे. खेड तालुक्यात 8 जिल्हा परिषद गट व 16 पंचायत समिती गण असून, निवडणूक जाहीर होताच इच्छुक उमेदवारांच्या पक्षांतराला वेग येतो, हा अनुभव तालुक्यातील सर्वसामान्य जनतेला वारंवार येतो. लोकसभा, विधानसभा, नगरपरिषद, पंचायत समिती, जिल्हा परिषद-कोणतीही निवडणूक असो, उमेदवारीसाठी पक्षांतर हा ‘महत्त्वाचा दुवा’ ठरत असल्याचे राजकीय जाणकारांचे मत आहे. ज्येष्ठ नेते शरद पवार यांच्या विचारांचा खंदा पाठीराखा मानला जाणारा खेड तालुका आज मात्र विचारांपेक्षा गट-तटांत विभागला गेल्याची भावना काही मुरब्बी, पण सध्या प्रवाहाबाहेर असलेल्या राजकीय व्यक्तींनी व्यक्त केली आहे. स्थानिक स्वराज्य संस्थांच्या निवडणुकांची खर्या अर्थाने रणधुमाळी सुरू होण्याआधीच इच्छुक उमेदवारांनी यात्रा, पैठणीचे खेळ, देवस्थानांना देणग्या, सण-उत्सवांनिमित्त महागड्या भेटवस्तू अशा विविध माध्यमांतून मतदारांपर्यंत पोहोचण्याचा प्रयत्न केल्याचे चित्र आहे. उमेदवारी मिळाली नाही, तर पक्षांतराची मानसिक तयारीही अनेकांनी ठेवली आहे. तालुक्यात ‘स्वगृही परतणे’, ‘विकासासाठी पक्षांतर’ अशा आकर्षक बिरुदांखाली थाटामाटात प्रवेश घेणार्यांची संख्या वाढत आहे. मात्र याला विरोध करत पक्षत्याग किंवा राजकीय संन्यासाची भूमिका घेणारे चेहरेही तालुक्यात दिसून येत आहेत. या निवडणुकीत राष्ट्रवादी काँग्रेस, शिंदे गट शिवसेना, उबाठा शिवसेना, भारतीय जनता पक्ष, काँग्रेस यांच्यासह अपक्ष उमेदवारांची संख्याही लक्षणीय असेल, असा अंदाज राजकीय निरीक्षक व्यक्त करीत आहेत. मात्र ऐन निवडणुकीच्या वेळी कोणाची युती कोणाबरोबर होईल, हे येणारा काळच ठरवेल. उबाठा सेनेचे विद्यमान आमदार बाबाजी काळे यांनी नुकत्याच झालेल्या नगरपरिषद निवडणुकीत स्वबळावर उभे केलेल्या काही उमेदवारांना अपवाद वगळता अपेक्षित यश मिळाले नाही. याउलट शिंदे गट शिवसेनेचे वर्चस्व वाढत असल्याचे मत राजकीय तज्ज्ञ व्यक्त करीत आहेत. भारतीय जनता पक्षाने तालुकास्तरावर नवे पदाधिकारी नियुक्त करत नव्या चेहर्यांना संधी दिल्याने त्याचा सकारात्मक प्रभाव पडू शकतो, अशी चर्चा आहे. काँग्रेसमधील अनेक पूर्वीचे कार्यकर्ते इतर पक्षांत गेल्याने काँग्रेस स्वबळावर किती जागा लढवणार, याकडे लक्ष लागले आहे. नाराज पण इच्छुक उमेदवारांकडून अपक्ष उमेदवारी जाहीर होण्याची शक्यताही नाकारता येत नाही. अधिकृत उमेदवारी जाहीर करताना पक्षनिष्ठा हाच एकमेव निकष असावा, अशी अपेक्षा सर्वसामान्य कार्यकर्ते व्यक्त करीत आहेत. राजकीय वर्तुळात ‘एक व्यक्ती – एक पद’ या संकल्पनेचा काहीसा विसर पडल्याचे चित्र तालुक्यात दिसत असून, त्यामुळे आधीच पदावर असलेले काही इच्छुक उमेदवारीच्या रांगेत उभे असल्याचेही दिसते. दरम्यान, गेल्या काही दिवसांपासून समाजमाध्यमांद्वारे प्रचाराला वेग आल्याने ही निवडणूक ‘हायटेक’ ठरेल, असे चित्र स्पष्ट होत आहे. जिल्हा परिषद गट (आरक्षण) कडूस – ओबीसी महिला मेदनकरवाडी – ओबीसी वाडा – अनुसूचित जमाती नाणेकरवाडी – सर्वसाधारण पाईट – सर्वसाधारण महिला रेटवडी – सर्वसाधारण महिला पिंपळगाव – सर्वसाधारण कुरुळी – सर्वसाधारण महिला पंचायत समिती गण (आरक्षण) वाशेरे – अनुसूचित जमाती नाणेकरवाडी – अनुसूचित महिला कडूस – सर्वसाधारण आळंदी ग्रामीण – सर्वसाधारण चास – सर्वसाधारण महिला वाफगाव – सर्वसाधारण रेटवडी – सर्वसाधारण पिंपळगाव – सर्वसाधारण महिला मरकळ – सर्वसाधारण महिला मेदनकरवाडी – नागरिकांचा मागास प्रवर्ग काळुस – नागरिकांचा मागास प्रवर्ग पाईट – नागरिकांचा मागास प्रवर्ग महिला आंबेठाण – सर्वसाधारण महिला महाळुंगे – सर्वसाधारण महिला कुरुळी – नागरिकांचा मागास प्रवर्ग
