Vaibhav Suryavanshi Youngest Captain Record : ‘वंडर बॉय’ वैभव सूर्यवंशीने आपल्या कामगिरीने क्रिकेट विश्वात नवा इतिहास रचला आहे. दक्षिण आफ्रिका दौऱ्यावर भारतीय अंडर-१९ संघाचे नेतृत्व करणाऱ्या वैभवने वयाची १५ वर्षे पूर्ण होण्याआधीच आंतरराष्ट्रीय मालिका जिंकून देणारा जगातील सर्वात तरुण कर्णधार होण्याचा मान मिळवला आहे. दुसऱ्या यूथ वनडे सामन्यात भारताने दक्षिण आफ्रिकेवर ८ गडी राखून (DLS पद्धत) मात केली आणि तीन सामन्यांच्या मालिकेत २-० अशी विजयी आघाडी घेतली. मिळालेल्या संधीचं केलं सोनं – नियमित कर्णधार आयुष म्हात्रे आणि उपकर्णधार विहान मल्होत्रा दुखापतग्रस्त झाल्यामुळे या मालिकेची सूत्रे अचानक १४ वर्षीय वैभव सूर्यवंशीकडे सोपवण्यात आली होती. इतक्या लहान वयात भारतीय संघाचे नेतृत्व करणारा तो पहिलाच खेळाडू ठरला होता आणि आता मालिका जिंकून त्याने या संधीचे सोने केले आहे. हेही वाचा – Mitchell Starc Record : मिचेल स्टार्कची कमाल; अश्विनला मागे टाकत रचला नवा इतिहास, स्टोक्ससाठी ठरतोय कर्दनकाळ! सूर्यासारखी तळपली बॅट; ८ ओव्हरमध्येच सामना संपवला दक्षिण आफ्रिकेने दिलेल्या २४६ धावांच्या आव्हानाचा पाठलाग करताना वैभव सूर्यवंशीने टी-२० स्टाईलने फलंदाजी केली. त्याने सुरुवातीच्या ८ षटकांतच आफ्रिकन गोलंदाजांचे कंबरडे मोडले. वैभवने केवळ १९ चेंडूत अर्धशतक पूर्ण केले. ९ व्या षटकात बाद होण्यापूर्वी त्याने अवघ्या २४ चेंडूत ६८ धावा कुटल्या, ज्यामध्ये तब्बल १० उत्तुंग षटकार आणि १ चौकाराचा समावेश होता. तो बाद झाला तेव्हा भारताची धावसंख्या १ बाद ९५ होती. पावसाचा व्यत्यय आणि भारताचा विजय – विजांच्या कडकडाटामुळे सामन्यात दोनदा अडथळा आला, त्यामुळे डकवर्थ-लुईस (DLS) नियमानुसार भारताला २७ षटकांत १७४ धावांचे नवे लक्ष्य देण्यात आले. अभिज्ञान कुंडू आणि वेदांत त्रिवेदी यांनी संयमी फलंदाजी करत २४ व्या षटकातच भारताला विजय मिळवून दिला. हेही वाचा – Pratika Rawal Controversy : AI चा गैरवापर अन् फोटोंशी छेडछाड! क्रिकेटर प्रतिका संतापली; एआय टूलला दिली ताकीद किशन सिंहची भेदक गोलंदाजी – तत्पूर्वी, भारताचा वेगवान गोलंदाज किशन सिंह याने आफ्रिकेच्या फलंदाजीला खिंडार पाडले. त्याने ५७ धावांतच आफ्रिकेचे ३ मुख्य फलंदाज बाद केले होते. आफ्रिकेच्या जेसन रोवल्सने (११४ धावा) एकटा झुंज दिली, पण किशनने त्यालाही बाद करत आपली चौथी विकेट घेतली. किशनने ८.३ षटकांत ४६ धावा देत ४ विकेट्स घेतल्या.
