Fursungi-Uruli Deva Municipal Council Election : आज २० डिसेंबर रोजी राज्यातील २३ नगरपरिषद आणि नगरपंचायतीसाठी मतदान पार पडत आहे. उद्या २१ डिसेंबर रोजी या मतदानाचा निकाल जाहीर होणार आहे. गेल्या अनेक दिवसांपासून जोरदार तयारी निवडणुकीच्या मैदानात असलेल्या उमेदवारांकडून करण्यात आली. या निवडणुका स्थानिक स्वराज्य संस्थेच्या असल्याने यास एक वेगळे महत्व असते. निवडणुकीच्या काळात सभांच्या माध्यमातून एकमेकांवर आरोप-प्रत्यारोप करण्यात येतात. वेळप्रसंगी टोकाची टीकाही केली जाते. मात्र, पुणे जिल्ह्यातील अशी एक नगरपरिषद आहे, जिथे एकाच वर्गात शिकलेले तीन मित्र एकाच प्रभागातून निवडणुकीच्या रिंगणात उतरले आहेत. जिल्ह्यातील फुरसुंगी उरुळी देवाची नगरपरिषदेतील प्रभाग क्रमांक एकमध्ये तीन मित्र एकाच प्रभागातून निवडणुकीला सामोरे जात आहे. भाजपकडून विराज करचे, राष्ट्रवादी काँग्रेस अजित पवार गटाकडून गिरीष ढोरे तर उद्धव ठाकरे यांच्या शिवसेनेकडून प्रकाश भारती हे तिघे मित्र एकमेकांविरोधात लढत आहेत. एक वकील, दुसरा इंजिनिअर आणि तिसरा उद्योजक आहे. या तिघांचीही मैत्री राजकारणापलीकडेची असल्याचे तिघेही नम्रपणे सांगतात. तिघेही निवडणुकीच्या रिंगणात असले तरी त्यांच्यासाठी ही निवडणूक मैत्रीमध्ये अडसर निर्माण करणारी नाही. कुणीही विजयी झाले तरी तितकाच आनंद होणार असल्याचे तिघेही सांगतात. त्यामुळे अशा अनोख्या राजकारणापलीकडच्या मैत्रीची चर्चा राज्यभरात होत आहे. पुणे जिल्ह्यातील बारामती, लोणावळा तळेगाव दाभाडे आणि दौंड नगरपरिषदेसाठी मतदान होत आहे. फुरसुंगी उरळी देवाची या नगरपरिषदेची ही पहिलीच निवडणूक आहे. त्यामुळे या ठिकाणी होणारी निवडणूक विशेष चर्चेत आली आहे. फुरसुंगी-उरुळी देवाची नगर परिषदेत सात उमेदवार नगराध्यक्ष पदासाठी रिंगणात आहेत. येथे एकूण ३२ जागांसाठी तब्बल १२० उमेदवार मैदानात उतरले आहेत. कोणताही अनुचित प्रकार घडू याची खबरदारी म्हणून सर्वच मतदान केंद्रावर चोख पोलीस बंदोबस्त तैनात करण्यात आला आहे. हेही वाचा : Sonakshi Sinha News: सोनाक्षी-जहीरच्या घरी पोहोचताच फराह खान थक्क; ‘महबूब स्टुडिओ’ची तुलना, प्रेग्नेंसी अफवांवरही केली गंमत
