राजकीय निष्ठा आणि पक्षांतराच्या चर्चेत, भोर नगरपरिषदेच्या निवडणुकीने एक नवा आणि निर्णायक अध्याय सुरू केला आहे. भाजचे (थोपटे गट) निकटवर्तीय आणि शहरातील प्रतिष्ठित उद्योगपती रामचंद्र नाना आवारे यांनी भाजप सोडून थेट राष्ट्रवादी काँग्रेसमध्ये प्रवेश केल्याने, भोरच्या राजकारणाची दिशा स्पष्टपणे बदलणार आहे. उपमुख्यमंत्र्यांनी तात्काळ दखल घेत त्यांना नगराध्यक्ष पदाची उमेदवारी दिली आहे. विकास आणि प्रामाणिकपणाची घुसमट रामचंद्र नाना आवारे हे मूळात जनतेशी जोडले गेलेले आणि प्रामाणिक वृत्तीचे नेते म्हणून ओळखले जातात. विकासाच्या मुद्द्यांवरून आणि वैचारिक मतभेदांमुळे त्यांची भाजपमध्ये घुसमट होत होती. ही बाब लक्षात घेऊन, त्यांनी नेतृत्व बदलण्याचा धाडसी निर्णय घेतला. पुण्यातील राष्ट्रवादी भवनात, उपमुख्यमंत्री अजित पवार यांच्या उपस्थितीत त्यांचा जाहीर प्रवेश झाला आणि त्याच क्षणी पवारांनी त्यांना नगराध्यक्ष पदाची उमेदवारी जाहीर केली. आवारे यांचा प्रामाणिकपणा, चारित्र्य आणि सर्वांशी जुळवून घेण्याची वृत्ती या जमेच्या बाजूंवर विश्वास ठेवून ही उमेदवारी दिल्याचे स्पष्ट झाले आहे. अजित पवारांची थेट भूमिका “व्यक्तीचा प्रामाणिकपणा आणि जनतेशी संवाद हीच खरी ताकद आहे. रामचंद्र आवारे यांच्या नेतृत्वावर आम्हाला पूर्ण विश्वास आहे.” आमदार मांडेकर यांना मिळाली नवी ताकद भोर-राजगड-मुळशी हा मतदारसंघ एकेकाळी थोपटेंचा (काँग्रेस/भाजप) बालेकिल्ला मानला जात होता. मात्र, राष्ट्रवादीचे आमदार शंकर मांडेकर यांनी हा गड भेदून विजयाची नोंद केली. आता नगराध्यक्ष पदासाठी रामचंद्र आवारे यांच्यासारखा जनमानसात लोकप्रिय असलेला चेहरा मिळाल्याने आमदार मांडेकर यांच्या ताकदीत मोठी भर पडली आहे. प्रचार शुभारंभाच्या सभेत आमदार मांडेकर यांनी आवारे यांच्या कामाचे तोंडभरून कौतुक केले. “जनतेतून आलेल्या या प्रतिसादावर मी समाधानी आहे. नाना आवारे यांच्या कार्यपद्धतीवर मतदार खुश आहेत,” असे गौरवोद्गार मांडेकर यांनी काढले. ‘जनशक्ती विरुद्ध धनशक्ती’चा ज्वलंत मुद्दा भोर नगरपालिकेची निवडणूक यंदा केवळ दोन राजकीय पक्षांमधील लढत राहिली नाही, तर ती ‘जनशक्ती विरुद्ध धनशक्ती’ अशी लढत म्हणून पाहिली जात आहे. बदलाची मागणी: भोर शहराचा खरा विकास झाला आहे का? हा प्रश्न सध्या केंद्रस्थानी आहे. मागील काळात ‘एकहाती सत्ता’ असल्यामुळे प्रशासनाचा तोल बिघडला आणि शहराचा विकास खुंटला, असा नागरिकांच्या एका मोठ्या गटाचा उघड आरोप आहे. राष्ट्रवादीचे सामान्य उमेदवार: आमदार मांडेकर यांनी दिलेले उमेदवार सर्वसामान्य कुटुंबातील असून त्यांची थेट जनतेशी नाळ जोडलेली आहे. आवारे यांचा ‘कनेक्ट’: नगराध्यक्ष पदाचे राष्ट्रवादीचे उमेदवार रामचंद्र आवारे यांची दीर्घकाळ केलेली जनसेवा आणि सततचा जमिनीवरचा संपर्क ही त्यांची सर्वात मोठी जमेची बाजू आहे. नागरिकांच्या मते, “विकासाला दिशा देणारा आणि सर्वांना जोडणारा चेहरा” म्हणून आवारे यांच्याकडे पाहिले जात आहे. जातीय राजकारण बाजूला ठेवून, शहर विकासाच्या मुद्द्यांवर ही निवडणूक लढवली जावी, अशी अपेक्षा भोरकर व्यक्त करत आहेत.
