Pimpri Chinchwad : राज्यातील नगरपरिषद आणि नगरपंचातींच्या निवडणुकांनंतर आता महापालिका निवडणुकांचे वेध लागले आहे. २३ डिसेंबर म्हणजेच आजपासून महापालिका निवडणुकीसाठी उमेदवारी अर्ज भरण्यास सुरूवात झाली असून, १५ जानेवारी २०२६ या दिवशी मतदान होणार आहे. तर निवडणुकीचा निकाल १६ जानेवारी २०२६ या दिवशी जाहीर केला जाणार आहे. महापालिका निवडणुका गेल्या पाच ते सहा वर्षांपासून रखडलेल्या होत्या. अखेर या निवडणुकांना मुहूर्त मिळाला आहे. मोठ्या प्रतिक्षेनंतर निवडणुका होत असल्याने इच्छूक उमेदवारांची लगभग सुरू असून आज उमेदवारी अर्ज भरण्यास सुरूवात झाली आहे. पुण्यासह लागून असलेल्या पिंपरी-चिंचवड महापालिका निवडणूक लढविण्यास अनेक इच्छूक असून, याच निवडणुकीसाठी राष्ट्रवादी काँग्रेस पक्षाचे नेते विधानसभेचे उपाध्यक्ष अण्णा बनसोडे यांचे चिरंजीव सिद्धार्थ बनसोडे इच्छूक आहेत. राष्ट्रवादी काँग्रेस पक्षाकडून निवडणूक लढणार असल्याचे त्यांनी स्पष्ट केले आहे. पण भाजपकडूनही त्यांना निवडणूक लढविण्याची विचारणा झाली होती, याबाबत सिद्धार्थ यांनी खुलासा केला आहे. तर अण्णा बनसोडे यांनी मात्र अशी कोणतीही विचारणा झाली नव्हती, असा दावा केला आहे. नेमकं घडलयं तरी काय? ते सविस्तर जाणून घेऊयात… नुकतेच पुण्यात अॅापरेशन लोटस राबवत शरद पवार यांच्या राष्ट्रवादी काँग्रेस पक्षाचे वडगाव शेरी विधानसभेचे आमदार बापूसाहेब पठारे यांचे सुपुत्र सुरेंद्र पठारे यांनी आपल्या हाती कमळ घेतले. त्यांच्यासह २२ जणांनी भाजपात पक्ष प्रवेश केला. ऐन महापालिका निवडणुकीच्या तोंडावर त्यांनी शरद पवार यांना रामराम करत भाजपात प्रवेश केल्याने चर्चांना उधाण आले आहे. अशातच अण्णा बनसोडे यांचे चिरंजीव सिद्धार्थ बनसोडे यांना देखील भाजपकडून अॅाफर आली होती, याबाबत त्यांनी सांगितले आहे. तसेच भाजपसह त्यांना इतरही पक्षांकडून अॅाफर मिळत असल्याची कबुली दिली आहे. सिद्धार्थ बनसोडे काय म्हणाले? अजितदादांनी माझ्या वडिलांवर मोठा विश्वास दाखवत, त्यांना विधानसभा उपाध्यक्षपद दिले. त्यामुळे आम्ही अजितदादांशी एकनिष्ठ राहू, असे विधान सिद्धार्थ बनसोडे यांनी केले आहे. मी पिंपरी चिंचवड महानगरपालिकेची निवडणूक लढण्यास इच्छुक आहे. हे समजल्यानंतर मला भाजपसह इतर पक्षांकडून विचारणा झाली, असल्याचे सिद्धार्थ बनसोडे म्हणाले. अंतिम निर्णयाकडे लक्ष दुसरीकडे पिंपरी-चिंचवड महापालिका निवडणुकीत भाजप आणि शिवसेना शिंदे यांची युती होणार असल्याचे जवळपास निश्चित मानले जात आहे. जागावाटपात चर्चा झाली असून याबाबतची संयुक्त पत्रकार परिषद घेऊन सविस्तर माहिती लवकरच देणार असल्याचे शिवसेनेचे खासदार श्रीरंग बारणे यांनी स्पष्ट केले आहे. या युतीत आम्ही 30 जागांची मागणी केली असल्याचे त्यांनी सांगितले आहे. त्यामुळे अंतिम निर्णय काय घेतला जाणार याकडे लक्ष लागले आहे. उपमुख्यमंत्री अजित पवारांच्या राष्ट्रवादीने भाजपपेक्षा जास्त जागांची ऑफर दिली तरी ती आम्ही स्वीकारणार नाही, अशी ठाम भूमिका बारणे यांनी व्यक्त केली आहे. हेही वाचा : मिशन महापालिका! आजपासून उमेदवारी अर्ज भरण्यास सुरूवात, राजकीय हालचालींना वेग
