पुणे : पुणे महापालिकेची १५ जानेवारीला निवडणूक असून, अवघ्या काही दिवसांवर निवडणूक येऊन ठेपलेली आहे. पुण्यात दोन्ही राष्ट्रवादी काँग्रेस पक्षाची युती झाली असून, आज पत्रकार परिषदेत राज्याचे उपमुख्यमंत्री अजित पवार यांनी पुण्यासाठी दोन्ही राष्ट्रवादी काँग्रेसचा जाहीरनामा प्रसिद्ध केला आहे. या जाहीरनामा कार्यक्रमासाठी शरद पवार यांच्या राष्ट्रवादी काँग्रेस पक्षाच्या कार्याध्यक्ष खासदार सुप्रिया सुळे या देखील उपस्थित होत्या. जाहीरनाम्यात पुण्यासाठी विविध घोषणा करण्यात आल्या असून, अजित पवारांनी पुणेकरांना मोफत मेट्रो आणि मोफत बस सेवेचे आश्वासन दिले आहे. पुण्यातील वाहतूक कोंडी आणि खराब रस्ते यामुळे पुणेकरांचे पेट्रोलच्या स्वरूपात दररोज साडे सात कोटी रुपये वाया जातात. अशाप्रकारे वर्षाला दहा हजार आठशे कोटी रुपये पेट्रोलच्या स्वरूपात वाया जातात. त्यामुळे ते पैसे मेट्रोच्या प्रवासासाठी वापरता येतील, असे अजित पवार यांनी सांगितले. याशिवाय जाहीरनाम्यात पुण्यासाठी स्वच्छता, रस्ते, वाहतूक कोंडी, पाणी यासंह विविध भेडसावणाऱ्या नागरी समस्यांचा प्लॅन सांगण्यात आला आहे. दिवसेंदिवस पुण्यातील वाढत्या वाहनांची संख्येमुळे मोठ्या प्रमाणावर प्रदूषण देखील होत आहे. यावर अजित पवार यांनी प्रदुषण रोखण्यासाठी नेमकं काय करणं गरजेचे आहे याविषयी सांगितले. मोठ्या प्रमाणावर पीएमपीएल बस आणि मेट्रोतून प्रवास झाला तर रस्त्यावर वाहनं कमी होतील यातुन पुणे प्रदुषणमुक्त होईल. हे शक्य आहे. अनेक तज्ञांशी बोलून मी हे सांगतो आहे, अशी माहिती अजित पवार यांनी दिली. तसेच आमच्या ताब्यात महापालिका दिली तर मी मोफत मेट्रो हे करून दाखवीन, असे मोठे आश्वासन अजित पवार यांनी पुणेकरांना दिले आहे. अजित पवार यांचा खोचक टोला आम्ही पुण्यात राहतो. त्यामुळे आम्हाला पुणेकरांबद्दल जिव्हाळा आहे. इतर बाहेरचे कोणी आले तर तेवढ्यापुरतेच येतील, असा खोचक टोला अजित पवारांनी विरोधकांना लगावला. आम्हालाच संधी द्या, असे आवाहन देखील अजित पवारांनी पुणेकरांना केले आहे. हेही वाचा : Pune News : अखेर कात्रज विकास आराखड्यावर उपमुख्यमंत्री एकनाथ शिंदेंकडून शिक्कामोर्तब!
