Border 2 Teaser : बॅार्डर २ चित्रपटाचा टीझर कधी प्रदर्शित होणार याची आतुरतेने प्रेक्षक वाट पाहत होते. अखेर चित्रपटाचा टीझर प्रेक्षकांच्या भेटीला आला आहे. भारतीय सैन्याच्या शौर्याची कथा पुन्हा एकदा मोठ्या पडद्यावर पाहायला मिळणार आहे. या चित्रपटात सनी देओल, वरुण धवन, दिलजीत दोसांझ आणि अहान शेट्टी यांच्या प्रमुख भूमिका आहेत. या चित्रपटाच्या टीझरने उत्सुकता वाढवली आहे. टीझरची सुरुवात सनी देओलच्या आवाजाने होते, ज्यामध्ये तो म्हणतो, “तुम्ही जिथे जिथे प्रवेश करण्याचा प्रयत्न कराल आकाशातून, जमिनीवरून, समुद्रातून… तुम्हाला तुमच्या समोर एक भारतीय सैनिक उभा असलेला दिसेल.” जो डोळ्यात पाहून अभिमानाने म्हणेल, ‘जर तुमच्यात हिंमत असेल तर या, हा भारत उभा आहे.’ यानंतर टीझरमध्ये १९७१ चे भारत-पाकिस्तान युद्ध दाखवण्यात आले आहे. यानंतर शकरगड सेक्टरमध्ये एक स्फोट होतो आणि तिथे वरुण धवनचे पात्र दाखवले जाते. त्यानंतर पुढचा स्फोट श्रीनगर येथील आयएएफ तळावर होतो, जिथे दिलजीत दोसांझ जखमी झालेला दिसतो. उत्तर अरबी समुद्राचा आहे, जिथे अहान शेट्टी जखमी झालेला दिसतो. त्यानंतर सनी देओल येतो, जो मिसाईल गनमधून गोळीबार करताना दिसतो. अशा प्रकारे पात्रांची ओळख टीझरने करून दिली आहे. हा चित्रपट सत्य घटनेपासून प्रेरित असल्याचे टीझरमध्ये सांगण्यात आले आहे. हा टीझर २ मिनिटे ४ सेकंदाचा असून, टीझर पाहून चाहत्यांची उत्सुकता वाढली आहे. दिलजीत दोसांझ वायुसेनेतील सैनिकाची भूमिका साकारणार आहे, तर अहान शेट्टी नौदलातील सैनिकाची भूमिका साकारणार आहे. सनी देओल “बॉर्डर” मधील त्याच्या भूमिकेसारखीच भूमिका साकारणार आहे. अनुराग सिंग दिग्दर्शित “बॉर्डर २” हा १९९७ च्या “बॉर्डर” चित्रपटाचा सिक्वल आहे. जेपी दत्ता दिग्दर्शित “बॉर्डर” चित्रपटाची कथा १९७१ च्या भारत-पाकिस्तान युद्धादरम्यान लोंगेवालाच्या लढाईवर आधारित होती. बॅार्डर २ प्रजासत्ताक दिनाच्या पार्श्वभूमीवर २३ जानेवारी २०२६ मध्ये चित्रपटगृहात प्रदर्शित होणार आहे. चित्रपटाच्या टीझरनंतर ट्रेलर आणि गाणी कधी येणार याकडे चाहत्यांचे लक्ष आहे. हेही वाचा : online shopping safety tips: ऑनलाइन शॉपिंग करताना काळजी घ्या, नाहीतर अकाउंट होऊ शकतं रिकामं
