Election 2026 – आगामी मुंबई महानगरपालिकेच्या निवडणुकीसाठी नामांकन दाखल केलेल्या संपत्तीच्या आकड्यांनी सर्वांचे लक्ष वेधून घेतले आहे. राज्य निवडणूक आयोगाच्या संकेतस्थळावर प्रसिद्ध झालेल्या प्रतिज्ञापत्रांनुसार, २०१७ च्या तुलनेत अनेक प्रमुख उमेदवारांच्या मालमत्तेत प्रचंड वाढ झाली असल्याचे दिसुन येत आहे. प्रस्थापित नेत्यांपासून ते नव्या दमाच्या उमेदवारांपर्यंत अनेकांची श्रीमंती कित्येक पटीने वाढल्याचे स्पष्ट झाले आहे. शिवसेना (उबाठा) नेत्या आणि माजी महापौर किशोरी पेडणेकर यांच्या संपत्तीत गेल्या सात-आठ वर्षांत २२६ टक्क्यांची वाढ झाली आहे. २०१७ मध्ये १.६१ कोटी रुपयांची मालमत्ता जाहीर करणाऱ्या पेडणेकर यांनी यंदा ५.२६ कोटी रुपयांची संपत्ती जाहीर केली आहे. दुसरीकडे, शिवसेना शिंदे गटाचे उमेदवार समाधान सरवणकर यांच्या संपत्तीत तब्बल ३९४ टक्क्यांची वाढ झाली असून त्यांची मालमत्ता ९.४३ कोटींवरून थेट ४६.५९ कोटी रुपयांवर पोहोचली आहे. भाजपच्या गोटातही संपत्ती वाढीचे असेच चित्र पाहायला मिळत आहे. माजी खासदार किरीट सोमय्या यांचे पुत्र नील सोमय्या यांची मालमत्ता २०१७ मधील १.९९ कोटींवरून आता ९.८९ कोटी रुपयांवर गेली असून ही वाढ ४०० टक्के इतकी आहे. भाजपचे नेते प्रभाकर शिंदे यांची मालमत्ता १७.६३ कोटी रुपये झाली आहे, जी २०१७ मध्ये ११.९ कोटी होती. दरम्यान, नुकताच भाजपमध्ये प्रवेश केलेल्या तेजस्विनी घोसाळकर यांची संपत्ती २०१७ मध्ये २५.८२ लाख होती, ती आता ५.१५ कोटींवर पोहोचली आहे. काही उमेदवारांच्या बाबतीत ही वाढ ७०० टक्क्यांहून अधिक आहे. शिवडी भागातून निवडणूक लढवणारे शिवसेना (उबाठा) उमेदवार सचिन पडवळ यांची मालमत्ता २०१७ मध्ये केवळ ६५ लाख होती, ती आता ५.४ कोटी रुपये झाली आहे. दहिसरमधून काँग्रेसच्या उमेदवार शीतल म्हात्रे यांनी ४.२७ कोटी रुपयांची संपत्ती जाहीर केली आहे, जी २०१७ च्या निवडणुकीत केवळ १७.२९ लाख रुपये होती. माजी आमदार यामिनी जाधव यांनीही १४.५७ कोटी रुपयांची मालमत्ता जाहीर केली असून, गेल्या विधानसभा निवडणुकीच्या तुलनेत त्यांच्या मालमत्तेत वाढ झाल्याचे दिसून येते. भायखळा परिसरातून निवडणूक लढवणाऱ्या गीता गवळी यांची संपत्ती ७.२६ कोटी रुपये आहे, तर त्यांच्या भगिनी योगिता गवळी यांनी पहिल्याच निवडणुकीत ३.६५ कोटी रुपयांची मालमत्ता असल्याचे प्रतिज्ञापत्रात म्हटले आहे. या सर्वांमध्ये माजी उपमहापौर बाबुभाई भवनजी यांची आकडेवारी सर्वाधिक थक्क करणारी असून, २०१७ मध्ये केवळ ८ लाखांची संपत्ती जाहीर करणाऱ्या भवनजी यांनी यंदा ३१.४४ कोटींची मालमत्ता दाखवली आहे.
