Chikhaldara Municipal Council : राज्यातील स्थानिक स्वराज्य संस्थांच्या निवडणुकीच्या पहिल्या टप्प्यातील नगरपरिषद आणि नगरपंचायत निवडणुकांचे कल समोर येत आहेत. बहुतांशी ठिकाणी मतदारांनी महायुतीला पसंती दर्शवली असून, अमरावती जिल्ह्यातील सर्वाधिक जागांवर भाजपने बाजी मारली आहे. पण याच जिल्ह्यातील एका नगरपरिषदमध्ये चित्र वेगळे आहे. चिखलदरा नगरपरिषद निवडणुकीत काँग्रेसने भाजपला धक्का दिला आहे. चिखलदारामध्ये काँग्रेसच्या नगराध्यक्ष पदाचे उमेदवार शेख अब्दुल शेख हैदर हे विजयी झाले आहेत. ४६१ मतांनी त्यांचा विजय झाला आहे. त्यांनी भाजपचे विद्यमान नगराध्यक्ष राजेंद्र सोमवंशी यांना पराभवाची धूळ चारली आहे. अमरावतीमधील १२ पैकी ९ जागांवर भाजपने विजय मिळवला आहे. अजित पवार यांच्या राष्ट्रवादी काँग्रेस पक्ष आणि शरद पवार यांच्या राष्ट्रवादी काँग्रेसला खातेही उघडता आलेले नाही. महत्वाची बाब म्हणजे मुख्यमंत्री देवेंद्र फडणवीस यांनी सोमवंशी यांच्यासाठी जाहीर सभा घेऊनही त्याचा काहीही फायदा झालेला निकालावरून दिसत आहे. या निवडणुकीत शिवसेना शिंदे गट, ठाकरे गट आणि काँग्रेसचा प्रत्येकी एक एक उमेदवार आघाडीवर आहे. अमरावती जिल्ह्यातील धामणगाव रेल्वे संघाचे भाजपचे विद्यमान आमदार प्रताप अडसड यांच्या भगिनी अर्चना रोडे यांचा विजय झाला आहे. या नगरपरिषदेत भाजपच्या ९ नगरसेवकांनी आतापर्यंत विजयी मिळवला आहे.
