Bhagyashree : ९० च्या दशकात आलेल्या ‘मैंने प्यार किया’ या चित्रपटामुळे रातोरात स्टार बनलेली अभिनेत्री भाग्यश्री दीर्घकाळाच्या विश्रांतीनंतर पुन्हा एकदा सिनेसृष्टीत परतली असून, तिने काही चित्रपटांमध्ये काम केले आहे. नुकत्याच एका न्यूज चॅनेलला दिलेल्या मुलाखतीत अभिनेत्रीने तिच्या सिनेसृष्टीतील पदार्पणाविषयी मनसोक्त गप्पा मारल्या. यावेळी बोलताना तिने मैंने प्यार किया चित्रपटाची अॅाफर कशी मिळाली याविषयीची आठवण सांगितली. ९० च्या दशकात बॅालीवूडमध्ये माधुरी दिक्षीत, उर्मिला मातोंडकर, सोनाली बेंद्रे या आघाडीच्या अभिनेत्रींचा काळ होता. या काळात अभिनेत्री भाग्यश्री हिने मैंने प्यार किया चित्रपटातून बॅालीवूडमध्ये दमदार एन्ट्री केली आणि ती रातोरात स्टार झाली. या चित्रपटात अभिनेता सलमान खानसोबतची तिची कमेस्ट्री प्रेक्षकांना खूपच भावली. मला चित्रपटांमध्ये अजिबात यायचे नव्हते. मला डॉक्टर व्हायचे होते. मग अचानक सूरज बडजात्या माझ्याकडे आले. त्यांनी ‘मैंने प्यार किया’ या चित्रपटाची ऑफर दिली. त्यावेळी चित्रपटांमध्ये काम करणे ही वाईट कल्पना मानली जात होती. म्हणून मी सूरज बडजात्या यांच्यासमोर अनेक अटी ठेवल्या, त्या अटी मान्य केल्यानंतर चित्रपटात काम करण्यास होकार दिला असल्याची आठवण भाग्यश्रीने सांगितली. हा चित्रपट बॅाक्स अॅाफिसवर सुपरहिट ठरला. त्यानंतर चित्रपटांमध्ये भाग्यश्री दिसली नाही. यामुळे तिने इंडस्ट्रीला रामराम केला असल्याच्या चर्चा होत होत्या. याविषयी बोलताना भाग्यश्री म्हणाली, चित्रपटांपासून दूर होती, तेव्हा कुटुंबावर आणि मुलांच्या संगोपनावर लक्ष केंद्रित केले. त्यांच्यासोबत आयुष्यातील खास क्षण जगले. मी बऱ्याच काळापासून कर्करोगाने ग्रस्त असलेल्या मुलांसाठी जागरूकता निर्माण करण्याचे आणि त्यांच्या आजारावर उपचार करण्यासाठी योगदान देण्याचा प्रयत्न करत आहे, असेही तिने यावेळी बोलताना सांगितले. अभिनेत्री पुन्हा एकदा सिनेविश्वात परतली असून तिने एक इच्छा यावेळी बोलताना व्यक्त केली. चित्रपटांव्यतिरिक्त तिला वेब सिरीजसारख्या माध्यमांमध्येही काम करायची इच्छा असल्याचे भाग्यश्रीने सांगितले. राजा शिवाजी चित्रपटात झळकणार रितेश देशमुखच्या छत्रपती शिवाजी महाराजांच्या जीवनावर आधारित “राजा शिवाजी” चित्रपटात भाग्यश्री महत्वाच्या भूमिकेत दिसणार आहे. “मी महाराष्ट्राची असून छत्रपती शिवाजी महाराज यांच्या जीवनावर आधारित चित्रपटाचा भाग असल्याचा मला आनंद असल्याची भावना तिने व्यक्त केली. हेही वाचा : “पापाराझींना काही बोललात, तर…”; राखी सावंतचा जया बच्चन यांना इशारा
