Sri Lanka – श्रीलंकेच्या नौदलाने भारताच्या १० मच्छीमारांना अटक केली असून त्यांचे ट्रॉलर देखील जप्त केले आहेत. श्रीलंकेच्या सागरी हद्दीमध्ये मासेमारी केल्याच्या आरोपावरून या मच्छिमारांना अटक करण्यात आली आहे. सोमवारी डेल्फट बेटाच्या उत्तरेकडील समुद्रातून या मच्छिमारांना अटक करण्यात आली, असे नौदलाने म्हटले आहे. या १० भारतीय मच्छीमारांना आणि त्यांच्या जप्त केलेल्या ट्रॉलरला कायदेशीर कारवाईसाठी जाफना येथील मायलिडी येथील मत्स्यव्यवसाय निरीक्षकांकडे सोपवण्यात आले, असे निवेदनात म्हटले आहे. एकमेकांच्या सागरी हद्दीत अनावधानाने घुसल्याबद्दल दोन्ही देशांतील मच्छिमारांना वारंवार अटक केली जाते. भारत आणि श्रीलंकेतील संबंधांमध्ये मच्छिमारांचा मुद्दा वादग्रस्त आहे. श्रीलंकेच्या जलक्षेत्रात बेकायदेशीरपणे प्रवेश केल्याच्या अनेक घटनांमध्ये श्रीलंकेच्या नौदलाच्या कर्मचाऱ्यांनी पाल्क सामुद्रधुनीत भारतीय मच्छिमारांवर गोळीबार केला आणि त्यांच्या नौका जप्त केल्या होत्या. पाल्क सामुद्रधुनी, तामिळनाडूला श्रीलंकेपासून वेगळे करणारी एक अरुंद खाडी आहे. २०२५ मध्ये श्रीलंकेच्या नौदलाने ३४६ भारतीय मच्छिमारांना बेकायदेशीर मासेमारीच्या आरोपाखाली अटक केली आणि ४४ ट्रॉलर जप्त केले होते.
