South Africa Squad Announce for T20 World Cup 2026 : येत्या ७ फेब्रुवारीपासून आयसीसी टी-२० विश्वचषक २०२६ स्पर्धेचा थरार सुरू होत आहे. या मेगा इव्हेंटसाठी सर्वच देशांनी आपले संघ जाहीर करण्यास सुरुवात केली आहे. भारतीय संघानंतर आता दक्षिण आफ्रिका क्रिकेट बोर्डानेही आपला १५ सदस्यीय संघ घोषित केला आहे. एडेन मारक्रम याच्याकडेच संघाचे नेतृत्व कायम ठेवण्यात आले असून, अनुभवी यष्टिरक्षक फलंदाज क्विंटन डी कॉकने निवृत्ती मागे घेत संघात पुनरागमन केले आहे. वेगवान गोलंदाजीची भक्कम फळी – दक्षिण आफ्रिकेची ताकद समजली जाणारी ‘पेस बॅटरी’ याही वेळी अत्यंत घातक दिसत आहे. बरगड्यांच्या दुखापतीमुळे दीर्घकाळ संघाबाहेर असलेला वेगवान गोलंदाज कगिसो रबाडा पूर्णपणे फिट होऊन संघात परतला आहे. त्याला साथ देण्यासाठी संघात एनरिक नोर्खिया, मार्को यान्सेन, कॉर्बिन बॉश, लुंगी एनगिडी आणि युवा क्वेना मफाका यांचा समावेश करण्यात आला आहे. फिरकीची धुरा केशव महाराज आणि जॉर्ज लिंडे यांच्या खांद्यावर असेल. अनेक दिग्गजांना डच्चू; संघात मोठे बदल – यावेळच्या निवडीत दक्षिण आफ्रिका बोर्डाने काही धाडसी निर्णय घेतले आहेत. २०२४ च्या विश्वचषकात चमकलेले ट्रिस्टन स्टब्स, रियान रिकेल्टन आणि रिझा हेंड्रिक्स यांना यावेळी संधी मिळालेली नाही. तसेच तबरेज शम्सी, गेराल्ड कोएत्झी आणि ओटनील बार्टमन यांसारख्या मॅचविनर खेळाडूंनाही १५ जणांच्या ताफ्यात स्थान मिळवता आलेले नाही. फलंदाजीमध्ये ‘किलर’ डेव्हिड मिलर, डेवाल्ड ब्रेविस आणि टोनी डी झोरझी यांच्यावर संघाची मदार असेल. हेही वाचा – IND vs BAN : मोठा बातमी! हिंदूंच्या नरसंहारानंतरही भारत बांगलादेशात क्रिकेट खेळणार? मालिकेचे वेळापत्रक जाहीर २०२४ च्या पराभवाचा वचपा काढणार? २०२४ च्या टी-२० विश्वचषकात दक्षिण आफ्रिकेचा संघ अंतिम फेरीपर्यंत पोहोचला होता. मात्र, भारताने त्यांचा पराभव करून विजेतेपदावर नाव कोरले होते. हेनरिक क्लासेन आणि डेव्हिड मिलर मैदानात असेपर्यंत दक्षिण आफ्रिका ऐतिहासिक विजय मिळवेल असे वाटत होते, पण भारतीय गोलंदाजांनी सामन्याचा पासा पलटवला होता. मागील वेळी हुकलेले विजेतेपद यंदा पटकावण्याच्या निर्धाराने एडेन मारक्रमचा संघ मैदानात उतरणार आहे. हेही वाचा – Shiv Sena UBT : ‘मुस्तफिजूरची KKR मधून हकालपट्टी करा, अन्यथा IPL…’, शिवसेनेचा (ठाकरे) शाहरुखसह BCCIला इशारा टी-२० वर्ल्ड कपसाठी दक्षिण आफ्रिकेचा संघ: एडेन मारक्रम (कर्णधार), कॉर्बिन बॉश, डेवाल्ड ब्रेविस, क्विंटन डी कॉक (यष्टिरक्षक), टोनी डी झोरझी, डोनोवन फरेरा, मार्को यान्सेन, जॉर्ज लिंडे, केशव महाराज, क्वेना मफाका, डेव्हिड मिलर, लुंगी एनगिडी, एनरिक नोर्खिया, कगिसो रबाडा, जेसन स्मिथ.
