Pankaja Munde : महाराष्ट्रात खळबळ उडणारी एक घटना नुकतीच घडली. भाजपच्या मंत्री पंकजा मुंडे यांचे स्वीय सहाय्यक अनंत गर्जे यांच्या पत्नी डॅा. गौरी गर्जे (पालवे) यांनी २२ नोव्हेंबरच्या दिवशी वरळी येथील राहत्या घरी आपल्या आयुष्याचा शेवट केला. गौरी यांच्या मृत्यू प्रकरणाने सर्वांनाच हादरवून सोडले आहे. या प्रकरणात अनेक धक्कादायक बाबी समोर आल्या आहेत. पालवे कुटुंबीयांनी गर्जे कुटुंबावर गंभीर आरोप केले आहेत. आमच्या मुलीने आत्महत्या केलेली नाही. तिची हत्या करण्यात आल्याचा दावा गौरीच्या आईवडीलांनी केला आहे. या प्रकरणी गौरी गर्जे (पालवे) यांचे पती अनंत गर्जेंना पोलिसांनी अटक केली आहे. या प्रकरणाची राज्यभरात चर्चा असतानाच मंगळवारी बीड जिल्ह्यातील शिरूर कासार तालुक्यातील पिंपळनेर गावात मंत्री पंकजा मुंडेंनी पालवे कुटुंबीयांची भेट घेत त्यांचे सात्वंन केले. या भेटीदरम्यान पंकजा भावूक झाल्या होत्या. पंकजा मुंडे यांना पाहताच गौरी गर्जे यांचे वडील अशोक पालवे यांना अश्रू अनावर झाले होते. आपल्या मुलीची व्यथा त्यांनी पंकजा मुंडेंसमोर मांडली. यावेळी या प्रकरणाचा तपास सुरू असून जो चुकला त्याला शिक्षा होईल, अशी ग्वाही पंकजा मुंडेंनी दिली. मला कल्पना असती तर मी अनंतच्या दोन कानाखाली…. यावेळी वडिलांनी पंकजा मुंडे यांच्यासमोरच आपल्या मुलीला आणि आपल्याला न्याय मिळावा अशी मागणी केली. कोणीही सुटणार नाही. अनंत गर्जे याने गुन्हा केला असेल तर त्याला शिक्षा होणारच, असे पंकजा मुंडेंनी पालवे कुटुंबीयांना सांगितले. मला कल्पना असती तर मी अनंतच्या दोन कानाखाली लावल्या असत्या, पण मला याबाबत काही माहितीच नाही, मी तर कळलं तेव्हा खालीच बसले असे पंकजा मुंडे म्हणाल्या. भगवान बाबा आणि मुंडे साहेबांची शपथ घेऊन सांगते की मी या प्रकरणात कोणालाही फोन केलेला नाही. सोबतच कोणालाही वाचवण्याचा प्रयत्न केला नाही. माझ्याकडे दहा पीए आहेत. पगारी नोकरांच्या घरात काय चाललंय हे कसे माहिती होईल. हे असं काही आहे ते नंतर मला समजलं, मला याबाबत काहीही माहिती नाही, असे सुरू असणाऱ्या चर्चांवर स्पष्टीकरण पंकजा मुडेंनी दिले. नेमकं काय आहे प्रकरण? मंत्री पंकजा मुंडे यांचे स्वीय सहाय्यक अनंत गर्जे यांच्या पत्नी गौरी गर्जे (पालवे) यांनी मुंबईतील वरळी येथील राहत्या घरी गळफास घेत आत्महत्या केली. या घटनेने महाराष्ट्रात मोठी खळबळ उडाली होती. या प्रकरणात गौरीच्या कुटुंबांनी तिची आत्महत्या नसून हत्या असल्याचा दावा केला आहे. या प्रकरणी पीए अनंत गर्जेला पोलिसांनी अटक केली असून, त्याला २८ नोव्हेंबरपर्यंत पोलीस कोठडी ठेवण्याचे आदेश कोर्टाने दिले आहेत. या प्रकरणाचा सखोल तपास पोलीस करत असून, धक्कादायक माहिती समोर येण्याची शक्यता आहे. हेही वाचा : pune : कोण भेदणार भाजपचा बालेकिल्ला?
