Simar Bhatia on Hardik Pandya : टीम इंडियाचा अष्टपैलू खेळाडू हार्दिक पंड्या आपल्या स्फोटक खेळाच्या जोरावर जगभरातील चाहत्यांच्या गळ्यातील ताईत बनला आहे. आता या यादीत बॉलिवूड अभिनेत्री सिमर भाटियाचेही नाव जोडले गेले आहे. भारत आणि दक्षिण आफ्रिका यांच्यातील चौथ्या टी-२० सामन्यापूर्वी स्टार स्पोर्ट्सच्या एका विशेष कार्यक्रमात सिमरने हार्दिक पंड्याचे भरभरून कौतुक केले. इरफान पठाणसमोरच हार्दिकची स्तुती – कार्यक्रमादरम्यान माजी वेगवान गोलंदाज इरफान पठाणने सिमरला आगामी टी-२० वर्ल्ड कपमध्ये भारताचा ‘तुरुपचा एक्का’ कोण ठरेल, असा प्रश्न विचारला होता. यावर उत्तर देताना सिमरने तीन खेळाडूंची नावे घेतली. तिने पहिले नाव सलामीवीर अभिषेक शर्माचे घेतले, तर दुसरे नाव हार्दिक पंड्याचे घेतले. सिमर म्हणाली, “हार्दिक पंड्या हा जगातील सर्वोत्तम ऑलराउंडर आहे. तो मोठ्या सामन्यांचा खेळाडू असून फलंदाजी आणि गोलंदाजी अशा दोन्ही विभागात उत्कृष्ट कामगिरी करतो.” विशेष म्हणजे, हार्दिकवर अनेकदा टीका करणाऱ्या इरफान पठाणसमोरच सिमरने हार्दिकची प्रशंसा केल्याने सोशल मीडियावर याची जोरदार चर्चा रंगली आहे. इरफान आणि हार्दिक यांच्यातील संबंध फारसे सलोख्याचे नसल्याचे बोलले जाते, मात्र सिमरने हार्दिकच्या प्रतिभेवर शिक्कामोर्तब केले. हेही वाचा – IND vs SA : शुबमन गिल चौथ्या सामन्याच्या प्लेइंग इलेव्हनमधून बाहेर? ‘या’ खेळाडूला मिळाली संधी पहिल्या सामन्यातील विजयाचा शिल्पकार – हार्दिक पंड्याने दक्षिण आफ्रिकेविरुद्धच्या चालू मालिकेतही आपली उपयुक्तता सिद्ध केली आहे. कटक येथे झालेल्या पहिल्या टी-२० सामन्यात हार्दिकने अवघ्या २८ चेंडूत नाबाद ५९ धावांची तुफानी खेळी केली होती. त्याच्या या खेळीमुळे भारताने १७५ धावांचा टप्पा गाठला आणि दक्षिण आफ्रिकेचा डाव अवघ्या ७४ धावांत गुंडाळला. या अष्टपैलू कामगिरीसाठी हार्दिकला ‘प्लेयर ऑफ द मॅच’ पुरस्काराने गौरवण्यात आले होते. हेही वाचा – AUS vs ENG : ॲशेसमध्ये ‘टेक्निकल’ राडा! आऊट असूनही दिले ‘नॉट आऊट’; कंपनीनेही मान्य केली चूक, पाहा VIDEO सिमर भाटियाचा चित्रपट येतोय – हार्दिक पंड्याची फॅन असलेली अभिनेत्री सिमर भाटिया लवकरच रुपेरी पडद्यावर पदार्पण करत आहे. तिचा ‘इक्कीस’ हा पहिला चित्रपट येत्या २५ डिसेंबर रोजी प्रदर्शित होणार आहे.
