Sanju Samson double milestone in IND vs SA 5th T20I : भारत आणि दक्षिण आफ्रिका यांच्यातील पाचव्या टी-२० सामन्यात संजू सॅमसनने आपल्या नावावर खास पराक्रम केला आहे. प्रदीर्घ प्रतिक्षेनंतर प्लेइंग इलेव्हनमध्ये संधी मिळालेल्या संजूने या सामन्यात केवळ ३७ धावांची खेळी केली, तरीही त्याने टी-२० क्रिकेटमधील दोन मोठे टप्पे पार करत दिग्गजांच्या यादीत प्रवेश केला आहे. ८००० धावांचा टप्पा पार करणारा सातवा भारतीय – संजू सॅमसनने दक्षिण आफ्रिकेविरुद्ध २२ चेंडूंत ३७ धावांची खेळी करताच टी-२० क्रिकेटमध्ये आपल्या ८००० धावा पूर्ण केल्या. असा पराक्रम करणारा तो केवळ सातवा भारतीय खेळाडू ठरला आहे. संजूच्या आधी रोहित शर्मा, विराट कोहली, शिखर धवन, सूर्यकुमार यादव, सुरेश रैना आणि केएल राहुल यांनीच हा टप्पा गाठला होता. संजूने आतापर्यंत ३२० टी-२० सामन्यांत ३०.०८ च्या सरासरीने ८०३३ धावा केल्या असून, यामध्ये ६ शतके आणि ५१ अर्धशतकांचा समावेश आहे. टी-२० आंतरराष्ट्रीय क्रिकेटमध्ये १००० धावा पूर्ण – केवळ एकूण टी-२० मध्येच नव्हे, तर भारतासाठी खेळतानाही संजूने एक मैलाचा दगड गाठला आहे. आपल्या ५२ व्या आंतरराष्ट्रीय टी-२० सामन्यात त्याने १००० धावांचा टप्पा ओलांडला. अशी कामगिरी करणारा तो भारताचा १४ वा फलंदाज ठरला आहे. संजूच्या नावावर आता आंतरराष्ट्रीय टी-२० मध्ये १०३२ धावा जमा असून यात ३ शतके आणि ३ अर्धशतकांचा समावेश आहे. हेही वाचा – IND vs SA : संजू सॅमसनचा कडक स्ट्रेट ड्राइव्ह, पण चेंडू अंपायरला लागला अन् सामनाच थांबला, पाहा VIDEO टी-२० विश्वचषकासाठी ठोकली प्रबळ दावेदारी- या सामन्यात भारतीय संघाने प्रथम फलंदाजी करताना २० षटकांत ५ गड्यांच्या मोबदल्यात २३१ धावांचा डोंगर उभा केला. संजूच्या या खेळीमुळे आणि त्याने गाठलेल्या विक्रमांमुळे आता निवड समितीसमोर पेच निर्माण झाला आहे. आगामी टी-२० विश्वचषकाच्या संघात संजूला स्थान मिळणार का? याकडे आता सर्व चाहत्यांचे लक्ष लागले आहे.
