पुणे – आरोग्य सेनेतर्फे आयोजित १२ वा स्मिता पाटील आंतराष्ट्रीय चित्रपट महोत्सव नुकताच पार पडला असून यात भारतीय चित्रपटांच्या वर्गवारीत शेफाली जैन आणि शिवी भटनागर यांनी दिग्दर्शित केलेल्या ‘एव्हरी नाऊ अँड देन गर्ल्स’ या लघुपटाने बाजी मारली आहे. सोबिता शाबा कुडतरकर यांना ‘द डे बिफोर द वेडिंग’ या लघुपटासाठी सर्वोत्कृष्ट दिग्दर्शकाचे पारितोषिक प्रदान करण्यात आले. स्पिफ’ चे संस्थापक-संचालक डॉ. अभिजित वैद्य यांच्या हस्ते आज या महोत्सवाचे पारितोषिक वितरण करण्यात आले. कला आणि धाडस हे चित्रपटांचा आत्मा असून त्याच्या उत्सवासाठी हा महोत्सव आयोजित करण्यात आला होता, असे प्रतिपादन यावेळी वैद्य यांनी केले. व्दितीय क्रमांकाचे पारितोषिक देखील कुडतरकर दिग्दर्शित ‘द डे बिफोर द वेडिंग’ या लघुपटाने पटकावले. स्मिता पाटील फिमेल फिल्ममेकर पारितोषिकासाठी चीनमधील ‘अक्रॉस द वॉटर्स’ या लघुपटासाठी वीव ली यांची निवड करण्यात आली. परदेशी लघुपटांच्या वर्गवारीत सर्वोत्तम लघुपटाचे प्रथम क्रमांकाचे पारितोषिक फ्रान्समधील पेपी गिन्सबर्ग दिग्दर्शित ‘वासपकेली’, व्दितीय क्रमांकाचे बेल्जियमच्या निकोलस पिअर्ट दिग्दर्शित ‘सायलेंट पॅनरोमा’, उत्कृष्ट दिग्दर्शक प्रथम क्रमांक ‘अलमोस्ट सर्टनली फेल्स’ या लघुपटासाठी कान्सू बायडर यांना, तर स्पेशल ज्युरी मेन्शन पुरस्कारावर फ्रान्समधील डेव्डिड अर्सलानियन यांच्या ‘बर्न अँड फेड’ ने मोहोर उमटवली.
