जालना : अनुसूचित जमाती (एसटी) प्रवर्गात समावेश करण्याच्या मागणीसाठी धनगर समाजाने पुकारलेल्या आंदोलनाच्या पार्श्वभूमीवर जालना जिल्ह्यात प्रशासनाने जमावबंदीचे आदेश लागू केले आहेत. जिल्हाधिकारी आशिमा मित्तल यांनी भारतीय नागरिक सुरक्षा संहितेच्या कलम १६३ अंतर्गत हा आदेश जारी केला आहे. जालना आणि अंबड ही आरक्षणसंबंधित आंदोलनांची केंद्रस्थाने असल्याने अनुचित परिस्थिती निर्माण होण्याच्या भीतीमुळे हा निर्णय घेण्यात आला आहे. जालना आणि अंबड तालुक्यात रविवारी पहाटे ५ वाजल्यापासून मध्यरात्रीपर्यंत जमावबंदीचे निर्बंध लागू राहतील. या जमावबंदीच्या आदेशांनुसार पाचपेक्षा जास्त व्यक्तींच्या एकत्र येण्यावर आणि शस्त्रे बाळगण्यावर बंदी घालण्यात आली आहे. सर्व दुकाने, व्यावसायिक आस्थापने आणि शैक्षणिक संस्था बंद ठेवण्याचे निर्देश देण्यात आले आहेत. जिल्हा प्रशासनाच्या माहितीनुसार, धनगर समाजाचे नेते दीपक बोरहाडे यांनी मुंबईतील आझाद मैदानावर आंदोलनाची योजना आखली होती, परंतु पोलिसांनी त्यांना त्यासाठी परवानगी नाकारली होती. बोरहाडे आणि त्यांचे समर्थक अंबड, जामखेड, पाचोड, दावलवाडी, पैठण नाका, शेवगाव, अहिल्यानगर, पाथर्डी, पंढरपूर, सांगोला आणि पुणे येथून मुंबईकडे निघण्याची शक्यता आहे, ज्यामुळे कायदा आणि सुव्यवस्थेचा प्रश्न निर्माण होऊ शकतो, असे आदेशात म्हटले आहे. धनगर समाज, जो पारंपरिकपणे मेंढपाळ आणि पशुपालक आहे, राज्याच्या लोकसंख्येच्या सुमारे ९ टक्के आहे. सध्या या समाजाला ओबीसी प्रवर्गातील भटक्या जमाती (एनटी-सी) अंतर्गत ३.५ टक्के आरक्षण मिळते. तथापि, हा समाज ‘धनगड’ या गटाला अनुसूचित जमाती म्हणून मिळालेल्या घटनात्मक मान्यतेचा हवाला देऊन आणि धनगर व धनगड एकच असल्याचा दावा करून स्वतःला अनुसूचित जमाती म्हणून मान्यता मिळावी अशी मागणी करत आहे.
