Sinnar Municipal Council : आज २० डिसेंबर रोजी राज्यातील २३ नगरपरिषदा आणि नगरपंचायतीसाठी विविध जिल्ह्यात मतदान होत आहे. सकाळी साडेसात वाजता मतदानाला सुरूवात झाली असून, सायंकाळी साडेपाच वाजेपर्यंतच्या वेळेत मतदारांना मतदान करता येणार आहे. कोर्टाने दिलेल्या आदेशानुसार २० डिसेंबरला या निवडणुकीसाठी मतदान होत आहे. नाशिक जिल्ह्यातील सिन्नर नगरपरिषद निवडणुकीसाठी एका मतदान केंद्रावर खळबळ उडवून देणारी घटना समोर आली आहे. मात्र, संबंधित केंद्रावरील निवडणूक कर्मचाऱ्यांनी दाखवलेल्या तत्पर्तेमुळे पुढे होणारा प्रकार थांबविण्यात यश आले आहे. नेमकं काय घडलं? सिन्नर नगरपरिषदेच्या प्रभाग क्रमांक 2 मधील मतदान केंद्रावर एक मतदार संशयास्पदरीत्या मतदानासाठी आल्याचे लक्षात आले. निवडणूक कर्मचाऱ्यांनी संबंधित मतदाराची चौकशी केली असता चौकशीत संबंधित व्यक्ती बनावट आधार कार्ड घेऊन मतदान करण्यासाठी आल्याचे निष्पन्न झाले. धक्कादायक बाब म्हणजे ही व्यक्ती आपल्या भावाच्या जागेवर मतदान करण्यासाठी आली होती, अशी माहिती चौकशीत समोर आली आहे. या प्रकारामुळे सिन्नरमध्ये खळबळ उडाली आहे. ही बाब उघड झाल्याने बोगस मतदानाला आळा बसला आहे. मिळालेल्या माहितीनुसार, संबंधित व्यक्तीला पोलिसांनी ताब्यात घेतले आहे. सध्या ज्या ठिकाणच्या मतदान केंद्रावर हा प्रकार समोर आला तेथील परिस्थिती नियंत्रणात आहे. निवडणूक आयोगाकडून या प्रकरणाचा सविस्तर अहवाल मागविण्यात येण्याची शक्यता आहे. नाशिक जिल्ह्यातील सिन्नर, ओझर आणि चांदवड नगरपरिषदेसाठी मतदान होत आहे. हे मतदान एकूण सहा जागांसाठी होत आहे. सिन्नरमधल्या तीन, ओझरच्या दोन तर चांदवडच्या एका जागेसाठी मतदान पार पडत आहे. सिन्नर नगरपरिषदेच्या निवडणुकीसाठी माजी मंत्री माणिकराव कोकाटे आणि खासदार राजाभाऊ वाजे यांची प्रतिष्ठा पणाली लागली आहे. हेही वाचा : ‘या’ महापालिकेसाठी भाजप मोठा निर्णय घेणार? वनमंत्री गणेश नाईक यांनी स्पष्ट केली भूमिका
