Nitin Gadkari Road Safety Policy India : देशातील वाढत्या रस्ता अपघातांच्या पार्श्वभूमीवर केंद्र सरकारकडून मोठा निर्णय घेण्यात येत असून, अपघातग्रस्तांना तात्काळ व दर्जेदार उपचार मिळावेत यासाठी कॅशलेस उपचार योजना लवकरच अमलात आणली जाणार आहे. केंद्रीय रस्ते परिवहन व महामार्ग मंत्री नितीन गडकरी यांनी यासंदर्भात महत्त्वाची माहिती दिली आहे. केंद्र सरकार तसेच सर्व राज्ये आणि केंद्रशासित प्रदेशांच्या परिवहन मंत्र्यांच्या दोन दिवसांच्या बैठकीत मोटार वाहन कायद्यातील ६१ दुरुस्त्यांचे प्रस्ताव मांडण्यात आले. या दुरुस्त्यांमध्ये रस्ता सुरक्षा, व्यवसाय सुलभता, नागरिक सेवा, उत्सर्जन नियम आणि आंतरराष्ट्रीय मानकांशी सुसंगती यावर विशेष भर देण्यात आला आहे. या बैठकीला २७ राज्यांचे परिवहन मंत्री व वरिष्ठ अधिकारी उपस्थित होते. नितीन गडकरी यांनी सांगितले की, ‘कॅशलेस ट्रीटमेंट ऑफ रोड एक्सीडेंट विक्टिम्स स्कीम, 2025’ अंतर्गत रस्ते अपघातात जखमी झालेल्या प्रत्येक व्यक्तीस दीड लाख रुपयांपर्यंत कॅशलेस उपचार दिले जाणार आहेत. अपघाताच्या तारखेपासून सात दिवसांपर्यंत ही सुविधा वैध राहणार असून, वाहन विमा नसलेल्या जखमींचा खर्च रस्ते सुरक्षा निधीतून केला जाणार आहे. या योजनेचा शुभारंभ पंतप्रधान नरेंद्र मोदी यांच्या हस्ते करण्यात येणार आहे. या योजनेनुसार देशातील कोणत्याही प्रकारच्या रस्त्यावर मोटार वाहनांमुळे झालेल्या अपघातांत जखमी झालेल्या नागरिकांना या सुविधेचा लाभ मिळणार आहे. उपचारात होणाऱ्या विलंबामुळे होणारे मृत्यू कमी करणे हा या योजनेचा मुख्य उद्देश असल्याचं गडकरी यांनी स्पष्ट केलं. यासोबतच, अपघातग्रस्तांना रुग्णालयापर्यंत पोहोचविणाऱ्या व्यक्तींना २५ हजार रुपयांचे बक्षीस दिले जाणार आहे. ‘हिट-अॅण्ड-रन’ प्रकरणांमध्ये गंभीर जखमींना मिळणारी मदत साडेबारा हजारांवरून ५० हजार रुपये, तर मृत्यू झाल्यास कुटुंबाला दिली जाणारी भरपाई २५ हजारांवरून दोन लाख रुपये करण्यात येणार आहे. दरम्यान, देशात सुमारे २२ लाख वाहनचालकांची कमतरता असल्याचं सांगत, वाहनचालक प्रशिक्षणासाठी देशभरात १,०२१ प्रशिक्षण केंद्रे सुरू करण्याचा निर्णयही घेण्यात आल्याची माहिती नितीन गडकरी यांनी दिली.
