पालघर : राज्यातील बहुतांश महानगरपालिकांमध्ये भाजप आणि महायुती सत्तेकडे वाटचाल करत असतानाच मुंबईच्या शेजारील वसई-विरार महानगरपालिकेत मात्र वेगळेच चित्र पाहायला मिळाले आहे. येथे भाजपसह शिंदे गट आणि ठाकरे गटाला मोठा धक्का बसला असून एका प्रादेशिक पक्षाने पुन्हा एकदा सत्ता काबीज केली आहे. बविआची स्पष्ट आघाडी वसई-विरार महानगरपालिका निवडणुकीत बहुजन विकास आघाडीने (बविआ) स्पष्ट बहुमत मिळवत सत्ता कायम राखली आहे. 115 सदस्यांच्या सभागृहात बविआने तब्बल 71 जागांवर विजय मिळवत बहुमताचा आकडा सहज पार केला आहे. त्यामुळे यंदाही वसई-विरार महापालिकेवर हितेंद्र ठाकूर यांच्या बविआचाच महापौर विराजमान होणार, हे जवळपास निश्चित झाले आहे. भाजपला मोठा धक्का या निवडणुकीत भाजपला 43 जागांवरच समाधान मानावे लागले, तर शिवसेना (शिंदे गट) ला केवळ एकाच जागेवर आघाडी मिळवता आली आहे. शिवसेना (उद्धव बाळासाहेब ठाकरे) गटाला मात्र एकही जागा मिळू शकलेली नाही. काँग्रेस, राष्ट्रवादी काँग्रेस (शरद पवार व अजित पवार गट), वंचित बहुजन आघाडी तसेच इतर पक्षांना देखील या निवडणुकीत संपूर्ण अपयशाला सामोरे जावे लागले आहे. बड्या नेत्यांना धक्का या निवडणुकीत काही प्रस्थापित नेत्यांनाही पराभवाचा सामना करावा लागला आहे. माजी महापौर रूपेश जाधव यांचा त्यांच्या प्रभागातून पराभव झाला आहे. मात्र, माजी महापौर प्रवीण शेट्टी यांनी आपला विजय कायम राखला आहे. प्रभाग क्रमांक 5 मध्ये बविआलाही धक्का बसला असून पक्षप्रमुख हितेंद्र ठाकूर यांचे चुलत भाऊ आणि माजी सभापती पंकज ठाकूर, तसेच माजी नगरसेवक हार्दिक राऊत यांचा पराभव झाला आहे. वसई-विरार महानगरपालिका अंतिम चित्र बहुजन विकास आघाडी (बविआ): 71 भाजप: 43 शिवसेना (शिंदे गट): 01 शिवसेना (उद्धव गट): 00 काँग्रेस: 00 राष्ट्रवादी काँग्रेस (SP): 00 राष्ट्रवादी काँग्रेस (AP): 00 वंचित बहुजन आघाडी: 00 इतर (SP, MIM, AAP, BSP): 00
